DDU: Qytaıda erekshe nemese jańa ınfektsııalar joq
Dúnıejúzilik densaýlyq saqtaý uıymy (DDU) Qytaıda respıratorly ınfektsııalardy juqtyrý jaǵdaılarynyń kúrt artýyn kún raıynyń salqyndaýymen jáne elde kovıdke qarsy shekteýlerdiń alynýymen baılanystyryp otyr. Kazinform bul týraly Euronews-ke silteme jasap habarlaıdy.
Buǵan deıin Qytaıda mıkoplazmalyq pnevmonııa ınfektsııasy sııaqty respıratorly aýrýlar kóptep taralyp jatqanyn jazǵan bolatynbyz. Osyǵan baılanysty Dúnıejúzilik densaýlyq saqtaý uıymy tolyq aqparat alý úshin Qytaıǵa suraý jibergen edi.
Beıjińnen kelgen jaýapqa súıenip DDU málim etkendeı, Qytaıda «jańa nemese ózgeshe» respıratorly ınfektsııalar paıda bolmaǵan.
Uıymnyń habarlaýynsha, alańdaýǵa ázirge sebep joq.
DDU-nyń Epıdemııa men pandemııalarǵa daıyndyq jáne olardy boldyrmaý máseleleri jónindegi ýaqytsha dırektory Marııa Van Kerkhoveniń Euronews-ke bergen suhbatynda atap ótkendeı, Qytaıda negizinen mektep oqýshylary arasynda respıratorly ınfektsııaǵa shaldyǵý jaǵdaılary aıtarlyqtaı artqan. Bul jaǵdaı eki faktormen baılanystyrylyp otyr: kún raıynyń salqyndaýy jáne elde koronavırýsqa qarsy shekteýlerdiń alynýy.
Qytaılyqtar úshin bul karantındik shekteýlersiz alǵashqy kúz. El bıligi ózgelerge qaraǵanda kovıdtik shekteýlerdi eń kesh alyp tastady – ótken jyldyń jeltoqsanynan bastap, 2023 jyl boıy kezeń-kezeńimen. «Adamdar betperdelerdi tastaǵannan keıin ádettegi maýsymdyq vırýstardy kóptep juqtyra bastaǵan», - deıdi DDU-dan.
