DDU eldegi ulttyq retteý júıesine baǵalaý júrgizedi
ASTANA. KAZINFORM — DDSU sarapshylarynyń saparlap kelý maqsaty Jahandyq benchmarkıng quralynyń kómegimen Qazaqstannyń ulttyq retteý júıesine keshendi baǵalaý júrgizý. Bul týraly DSM baspasóz qyzmeti habarlady.
Densaýlyq saqtaý mınıstri Aqmaral Álnazarova ulttyq retteý júıesin baǵalaý úshin Qazaqstanǵa kelgen Dúnıejúzilik densaýlyq saqtaý uıymynyń delegatsııasymen kezdesti.
Dárilik zattar men medıtsınalyq buıymdardy saraptaý ulttyq ortalyǵynda Densaýlyq saqtaý mınıstri Aqmaral Álnazarovanyń doktor Alıreaz Hadım bastap kelgen Dúnıejúzilik densaýlyq saqtaý uıymynyń (DDSU) delegatsııasymen kezdesýi ótti.
Baǵalaý dárilik zattar aınalymy salasyndaǵy tirkeý, saraptaý, farmakoqadaǵalaý, ınspektsııalaý, marketıngten keıingi qadaǵalaý jáne baqylaý, lıtsenzııalaý, zerthanalyq zertteýler jáne klınıkalyq zertteýlerdi qadaǵalaýdy qosa, retteý fýnktsııalarynyń negizgi ındıkatorlaryn qamtıdy.
Aýdıt bir apta boıy ótkiziledi, onyń qorytyndylary boıynsha ınstıtýttyq damytý jospary jańartylady jáne Qazaqstannyń ulttyq retteý júıesin áriqaraı nyǵaıtýdyń jol kartasy kelisiledi.
Mınıstrdiń aıtýynsha, elimizdiń ulttyq retteý júıesi belsendi damý ústinde jáne jańa kemeldik deńgeıine kóterilgen: zańnamalyq baza jańartylýda, zamanaýı tsıfrlyq sheshimder men jasandy ıntellekt elementteri engizilýde, tirkeý rásimderi ońtaılandyrylyp jatyr. Ulttyq retteýdi halyqaralyq standarttarmen úılestirýge, PIC/S júıesine qosylýǵa daıarlanýǵa, sonymen qatar EAEO, Shanhaı yntymaqtastyq uıymy jáne Túrik memleketteriniń uıymy sheńberinde yntymaqtasýdy damytýǵa erekshe kóńil bólinedi.
Álnazarova hanym Qazaqstannyń suhbatqa daıyn ekenin málimdep, DDSU-men birge kúsh jumyldyrýmen ulttyq retteý júıesiniń kelesi úshinshi kemeldik deńgeıine sátti kóteriletinine senimdiligin bildirdi.
DDSU delegatsııasynyń jetekshisi, doktor Alırez Hadım óz tarapynan Densaýlyq saqtaý mınıstrligine retteý júıesin damytý jolyndaǵy aınymas tabandylyq pen Qazaqstan men DDSU arasyndaǵy uzaq ýaqyt jalǵasyp kele jatqan yntymaqtastyq úshin alǵys aıtty.
Ol alǵashqy sapar sátinen bastap eleýli ilgeri damýdyń baıqalatynyna súıinish bildirdi: elde tirkeý jáne baqylaý maqsatyndaǵy tsıfrlyq sheshimder engizilgen, qazirgi zamandyq zerthanalar damytylyp jatyr, úderisterdiń ashyqtyǵy joǵary deńgeıde qamtamasyz etilgen, Eýrazııalyq ekonomıkalyq odaq sheńberinde ózara árekettesýdiń turaqty jelisi qurylǵan. Birqatar baǵyt mysaly, zerthanalardyń jumys deńgeıi boıynsha Qazaqstan 4 deńgeıge jýyq kemeldik deńgeıiniń kórinisin beredi.
Sarapshynyń sózi boıynsha, aǵymdaǵy baǵalaý ınspektsııalaý men tirkeý kýálikterin berýden bastap farmakologııalyq qadaǵalaý jáne etıkalyq komıtetterdi basqarýǵa deıingi retteý júıesiniń 8-9 fýnktsııasyn taldaýdy qamtıtyn DDSU standartty ádisnamasy (Global Benchmarking Tool) boıynsha júrgiziledi.
Doktor Hadım Qazaqstannyń óńirlik retteýshiler jelisinde aıshyqty ról atqaratynyn jáne osy salanyń damý kelesheginde aýqymdy qýattylyǵy tanylatynyn atap ótti.
Aıta ketelik dárigerlerge arnalǵan JI-assıstent jumys isteıtin bolady.