Dáýren Teńesov: Testileýde kóshirip jazǵan adam grant utyp alsa, ádiletsiz bolady

NUR-SULTAN. QazAqparat - Men ádildikti jaqtaımyn. Sondyqtan memlekettik bilim grantyn tyıym salynǵan zattardy paıdalanǵan talapker emes, test tapsyrmalaryn tek óz bilimine senip oryndaǵan testilenýshi utyp alǵanyn qalaımyn. Soltústik Qazaqstan oblysy Ǵabıt Músirepov aýdany Toqsan bı orta mektebiniń túlegi Dáýren Teńesov osylaı deıdi. Talapker Ulttyq biryńǵaı testileýde 109 ball jınady, dep habarlaıdy QazAqparat Bilim jáne ǵylym mınıstrligine silteme jasap.

«Men ótken jylǵy túlekterden «UBT-da kóshirip jazý ábden múmkin jáne qalypty jaǵdaı», «men shpargalka paıdalandym», «tyıym salynǵan zattardy paıdalandym, degenmen eshkim baıqamady» degen áńgimelerdi jıi estıtinmin. Ókinishke qaraı, kóptegen túlek kóshirip jazý jáne tyıym salynǵan zattardy paıdalanýǵa qatysty oń kózqarasta. Meniń oıymsha, testilenýshiler kóbine shpargalkany ózine senimsiz bolǵan soń paıdalanady nemese materıaldy tolyq meńgerýge tyryspaıdy. Shyny kerek, UBT-ǵa daıyndalý úshin ýaqyt jetkilikti , sondaı-aq Ulttyq testileý ortalyǵynyń saıtynda baıqaý synaqtary qoljetimdi boldy . Testilenýshilerdiń b arly ǵy derlik ereje buzýshylyqtyń saldarlary qandaı bolatynyn jaqsy túsinedi. Deı turǵanmen, keıbireýler bul áreketterin ári qaraı jalǵastyryp jatyr», – deıdi Dáýren Teńesov.

Dáýren testileýge kirgizý barysynda tyıym salynǵan zattar anyqtalǵan jaǵdaıda nátıjelerdi joıý jáne talapkerdi UBT tapsyrý múmkindiginen bir jylǵa aıyrý ádil sheshim dep sanaıdy.

«Bıyl kalkýlıatordy qoldanýǵa ruqsat etildi, bul - talapker úshin óte jaqsy múmkindik. Test tapsyrýdy josparlap otyrǵan túlekterge aıtarym: emtıhanda shpargalka nemese qosymsha ádebıetti paıdalaný múmkin emes. Barlyq aýdıtorııada beınekamera ornatylǵan jáne onlaın-translıatsııa júrgiziledi. Nátıjesinde testilenýshiler naqty ýaqyt rejıminde baqylanyp, beınejazba 25 tamyzǵa deıin taldanyp, zerdelenedi. Meniń oıymsha, talapkerler testileý barysynda jańa erejelerdi saqtap, talaptardy barynsha oryndaý qajet ekenin túsingen sııaqty», – deıdi túlek.

Bıyldan bastap UBT-ǵa kirgizý jáne emtıhan kezinde testilenýshiden uıaly baılanys quraldary, anyqtamalyq materıaldar, «shpargalka» jáne basqa da aqparat almasý quraldary anyqtalǵan jaǵdaıda talapkerdiń nátıjesi joıylady, sondaı-aq ol bir jyl boıy UBT-ny tapsyrý múmkindiginen aıyrylady.

«Adam balasy tek óz kúshine ǵana senýi kerek. Osyndaıda Abaı atamyzdyń ónegeli sózderi tilge oralady: «Ózińe sen, ózińdi alyp shyǵar, eńbegiń men aqylyń eki jaqtap». Sondyqtan eń aldymen ózimizge senimdi, adal bolýymyz kerek», - dep Dáýren Teńesov oıyn qorytyndylady.