Dáýren Abaev Túrkistandaǵy Halyqaralyq týrızm ýnıversıtetiniń jumysymen tanysty
Budan bólek, vedomstvo basshysy oqý ornynyń materıaldyq-tehnıkalyq bazasyn kórip shyqty. Ujymmen jáne stýdenttermen kezdesip, suhbat qurdy.
«Túrkistan oblysynyń týrızm salasynda bolashaǵy zor dep esepteımin. Halyqaralyq týrızm jáne meımandostyq ýnıversıtetine arnaıy kelip, oqý ornynyń ári qaraı damýyna qandaı múmkindikter jasalýy qajet ekenin bilý negizgi maqsattyń biri boldy. Osy máselelerdi anyqtaǵan soń, Túrkistannyń týrızm salasyn da, ýnıversıtetti de qalaı damytý qajettigin biletin bolamyz. Jalpy, oqý orny jaqynda ashylǵandyqtan, birinshi jáne ekinshi kýrs stýdetterin ǵana oqytyp jatyr. Birer jylda jastardyń sany artatyndyqtan, mindetti túrde taǵy jańa korpýs pen jataqhana salýymyz kerek», - dedi mınıstr.
Taıaýda Májilistegi Úkimet saǵatynda QR Mádenıet jáne sport mınıstri Dáýren Abaev 2025 jylǵa qaraı týrızm salasynda 60 myńǵa jýyq jańa jumys orny ashylatynyn aıtqan bolatyn. Bul bilikti kadrlarǵa degen suranysty arttyratyny anyq. Mınıstr Halyqaralyq týrızm jáne meımandostyq ýnıversıteti mamandardy daıyndaýda negizi bazaǵa aınalýy múmkin ekendigin aıtyp ótti.
Aıta keteıik, Túrkistan qalasynda Halyqaralyq týrızm jáne meımandostyq ýnıversıteti 2020 jyly ashylǵan bolatyn. Qazirgi tańda oqý protsesi alty bilim berý baǵdarlamasy boıynsha júrgizilýde. Týrızm jáne qonaqjaılylyq ındýstrııasyn uıymdastyrý, halyqaralyq jáne ishki týrızm, Ekskýrsııalyq qyzmetter men jeke týrlardy uıymdastyrý, Týrıstik destınatsııalar menedjmenti, qonaq úı jáne meıramhana bıznesi, dene shynyqtyrý jáne sport baǵyty boıynsha mamandar daıyndaýda. Stýdentter qatary da jyl saıyn artyp keledi.
