Dáýren Abaev: Prezıdenttiń kún tártibi qoǵamnyń shynaıy suranysyna jaýap beredi

NUR-SULTAN. QazAqparat – Ulttyq keńeste Prezıdent Qasym-Jomart Toqaevtyń kótergen bastamalary men usynystary kúmánshilerdiń sózin joqqa shyǵaryp otyr. Aqparat jáne qoǵamdyq damý mınıstri Dáýren Abaev keńes otyrysy jaıly osyndaı pikir bildirdi, dep habarlaıdy QazAqparat.

«Memleket basshysynyń Ulttyq keńeste sóılegen sóziniń eshkimdi beı-jaı qaldyrmaǵany qýantady. Álbette, kúmánshilder jańa argýmentterdi taýyp, keńesti paıdasyz etip kórsetkisi keledi. Alaıda Prezıdenttiń málimdemesi olardyń sózin joqqa shyǵaryp otyr. Prezıdenttiń kún tártibi qoǵamnyń shynaıy suranysyna jaýap bere alady. Sol sebepti, usynystar azamattardyń qoldaýyna ıe bolýda», - dedi Dáýren Abaev Habar arnasynan kórsetilgen «Ashyq dıalog» baǵdarlamasynda.

Mınıstr partııa qurýda kedergilerdi tómendetý, mıtıngti uıymdastyrýda eskertpe qaǵıdattardy engizý, parlamenttik oppozıtsııa ınstıtýty týraly aıtylǵanyn eske saldy.

«Bálkim, tapsyrmalardyń saıası-ekonomıkalyq bóligi de kórinbeı qalýy múmkin. Máselen, aýyl sharýashylyǵy jerlerine ǵaryshtan monıtorıng jasaý arqyly ǵaryshtan túsirilgen sýretter arqyly paıdalanylmaı jatqan jerlerdi anyqtaýǵa bolady. Tıisti jumys júrgizilip, jyldar boıy jatqan ol aýmaqtar shynaıy eńbekqorlarǵa tapsyrylady degen oıdamyn. Sol sekildi, sheteldik jumysshylarǵa beriletin kvotalardy qysqartý máselesi keńinen talqylanǵaly jatyr. Osynyń bári de qazaqstandyq jumysshylardy dıskrımınatsııalaýdy shekteıdi. Al dıskrımınatsııa – áleýmettik dúmpýge sebep bolyp kelgen edi», - dedi ol.

Eske sala ketsek, QR Prezıdenti Qasym-Jomart Toqaevtyń qatysýymen Ulttyq qoǵamdyq senim keńesiniń ekinshi otyrysy ótken bolatyn.