Dáýren Abaev tsıfrlyq dáýirdegi áıelderdiń róli týraly aıtty
«Ekonomıkanyń tsıfrlandyrylýy... Ekonomıka salalaryn tsıfrlandyrý - kólik pen logıstıkadan bastap Smart-qalalarǵa deıingi salalardy qamtıdy. Demek, bul saıyp kelgende aıyppuldan bastap densaýlyqtyń elektrondy medıtsınalyq qujatyna deıingi qujattarǵa qatysty bolmaq. Munyń barlyǵy atalmysh baǵdarlamanyń arqasynda tsıfrlandyrylady. Málimettter bazasy daıyndalyp, anyqtamalardyń sany qysqartylady. ıAǵnı, aýqymdy jumysty iske asyrý kózdelýde. Árbir mınıstrlik, árbir memlekettik organ jáne kvazımemlekettik sektor qandaı jumystardy atqarý kerektigin, qandaı qadamdar jasalýy tıis ekenin biledi», - deıdi Dáýren Abaev Astanadaǵy «Ideas for women» (IFW-2018) - Tórtinshi ónerkásip revolıýtsııasynyń syn-tegeýrinderi» atty forýmda.
Mınıstrdiń aıtýynsha, «Tsıfrlyq Qazaqstan» baǵdarlamasyn júzege asyrýda «Tsıfrlyq memleket - proaktıvti memleket» maqsaty bolmaq.
«Biz anyqtamalar men qyzmetterdi aldyn ala kórsetemiz. Máselen, biz qazir bir memlekettik organnan ekinshisine bir qujatty alyp barý úshin kóp anyqtamany alý kerektigin kórip otyrmyz. Demek, máselen adamdar Bilim jáne ǵylym mınıstrligine bir qujatty aparý úshin mindetti túrde ákimdikke barýy tıis. ıAǵnı, qajetti málimetter bazasynyń barlyǵyn biriktiremiz de, osydan keıin bir ǵana memlekettik organnan qajetti qujatty ala alatyndaı jaǵdaı jasalady. Demek, bitip bolmas anyqtamalardyń sońynan sandalýdyń reti bolmaıdy», - deıdi mınıstr.
«Besinshiden, bizge álbette ekojúıe kerek. Bizge jańa ónimderdi jasaı biletin daryndy adamdar kerek. Bul biz úshin asa mańyzdy. Sondyqtan, Memleket basshysynyń sheshimimen biz EKSPO aýmaǵynda «Astana-habtyń» irgesin qalaımyz. Jastar úshin, ІT-mamandar úshin oı almasyp, ónim jasaı alatyn alań kerek. Osy alańǵa bıznesmender kelip, jas daryndardyń aldyna tapsyrma qoıady. Bul álbette óte bir jaıly ekojúıe bolmaq», - deıdi ol.
Dáýren Abaev osy rette Qazaqstannyń isker áıelder qaýymdastyǵynyń da rólin atap ótti.
«Mine, osy rette men azdaǵan ázil aralas sóz aıtqym keledi. AQSh-tyń burynǵy Memlekettik hatshysy Madlen Olbraıt: «Tozaqta áıelderge kómektespegen áıelderge arnalǵan arnaıy oryn bar» degen sózi bar. Mine, búgingi zalda áıelderdiń yntymaqtastyǵy ıdeıasyn iske asyra alatyn jáne ózara bir-birine kómektese biletin názik jandylar jınalyp otyr. Demek, sizder úshin ol jerde oryn joǵy anyq», - deıdi Dáýren Abaev.
Mınıstrdiń aıtýynsha, áıelderdiń kásipkerliginiń aldaǵy ýaqyttaǵy jetistigi barshylyq.
«Al kele jatqan tsıfrlyq dáýir - bul múmkindikterdiń jańa terezesi. Sol arqyly biz osy áleýetti shynaıy túrde iske asyra alamyz», - dep túıdi mınıstr.
Aıta ketsek, Astanada búgin «Ideas for women» (IFW-2018) - Tórtinshi ónerkásip revolıýtsııasynyń syn-tegeýrinderi» atty forým jumysyn bastady. Forýmdy Qazaqstandaǵy Eýropa qaıta qurý jáne damý bankiniń qoldaýymen Qazaqstannyń isker áıelder qaýymdastyǵy uıymdastyryp otyr. Іs-shara elimizdegi áıelder kásipkerligin álemdik ekonomıkanyń damý deıgeıine shyǵarý maqsatynda uıymdastyrylǵan.
