Dáýren Abaev aýyl men qala arasyndaǵy «tsıfrlyq alshaqtyqty» joıý jolyn atady
«Álem úzdiksiz ózgeriske ushyrap keledi. Tsıfrlyq tehnologııalar memleketterdiń básekege qabilettiliginiń sheshýshi faktory bolyp otyr. Jańa syn-tegeýrinder ýaqtyly sheshim qabyldaýdy qajet etedi. Mine, sondyqtan, Memleket basshysynyń tapsyrmasymen bizdiń mınıstrlik «Tsıfrlyq Qazaqstan» aýqymdy baǵdarlamasyn jasap shyǵardy. Atalǵan qujat bizdiń elimizdiń qoǵamdyq-ekonomıkalyq turǵydaǵy barlyq salany qamtýdy kózdep otyr. Onyń makroekonomıkalyq áseri de aıqyn bolmaq», - deıdi mınıstr.
Dáýren Abaev forým barysynda «Tsıfrlyq Qazaqstan» baǵdarlamasy týraly qysqasha ári uǵynyqty túrde baıandap berdi.
«Eń birinshi kezekte bul - ınfraqurylym. Biz qazirgi tańda aýyl men qalanyń arasynda úlken aıyrmashylyq baryn bilip otyrmyz. Demek, «tsıfrlyq alshaqtyq» paıda boldy. Ony da ózderińiz jaqsy bilesizder. Qalada jyldam 4G bar desek, aýyldardaǵy ınternettiń qaýqary 2G-ǵa da jete bermeıdi. Al elimizdegi halyqtyń 40 paıyzy aýyldarda turady. Demek, olar qaladaǵydan góri sapasy azdaý bilim, medıtsınalyq bilim, sonymen qatar memlekettik qyzmetti alýy múmkin. Sondyqtan, memleket eń aldymen ınvestıtsııa salatyn bolady. Ózderińiz biletindeı, jerimiz baıtaq bolǵanymen, halyq sany az. Sondyqtan, jeke bızneske bul álbette qolaısyz. Sondyqtan, memleket 25 myń optıkalyq talshyq salýǵa ázir. Bul úshin áleýetti degen 1249 aýyl belgilendi. Osylaısha, belgilengen aýyldarǵa sapaly ınternet jetedi», - deıdi Dáýren Abaev.
Ekinshiden, kreatıvti qoǵam. Bizge mamandar kerek. ІT salada ǵana emes, bizge zamanaýı tehnologııalarmen jumys isteı alatyn dárigerler, muǵalimder, polıtsııa qyzmetkerleri kerek.
«Sondyqtan, árbir jaýapty mınıstrlik óz baǵyty boıynsha halyqty zamanaýı tehnologııalar boıynsha oqytatyn bolady. «Nur Otan» da bul sharýaǵa atsalysýda. Stýdentter úshin ǵana emes, halyqtyq barlyǵy úshin jazǵy kýrstar ótetin bolady. Bul - biz úshin mańyzdy tapsyrma. Sondyqtan, biz kreatıvti qoǵamdy qura bilýimiz kerek», - deıdi Dáýren Abaev.
Aıta ketsek, Astanada búgin «Ideas for women» (IFW-2018) - Tórtinshi ónerkásip revolıýtsııasynyń syn-tegeýrinderi» atty forým jumysyn bastady. Forýmdy Qazaqstandaǵy Eýropa qaıta qurý jáne damý bankiniń qoldaýymen Qazaqstannyń isker áıelder qaýymdastyǵy uıymdastyryp otyr. Іs-shara elimizdegi áıelder kásipkerligin álemdik ekonomıkanyń damý deńgeıine shyǵarý maqsatynda uıymdastyrylǵan.
