Dáýren Abaev almatylyqtarǵa Elbasy Joldaýyndaǵy basym baǵyttar týraly aıtty
Mınıstr qala turǵyndaryna, bıznesmenderge, halyq qalaýlylaryna Memleket basshysy Nursultan Nazarbaevtyń Joldaýynda kórsetilgen mindetter is júzinde qalaı júzege asatynyn túsindirdi.
Onyń aıtýynsha, qazir Almatyda Joldaýdyń «Qurylys pen kommýnaldy sektorǵa zamanaýı tehnologııalardy engizý» atty 5-pýknty júzege asyrylyp keledi.
«Almaty ákimi óz esebinde qurylys salasyna tolyq toqtaldy. Sonymen qatar qalada smart-city jobasy júzege asyrylyp keledi. Qala qurylysyna qajetti zamanaýı elementter paıdalanylyp jatyr. Qurylysy bastalǵan nemese burynnan bar ınfraqurylymdar ıntellektýaldy basqarý tetigimen basqarylyp otyrady. Bul qalanyń jaılylyǵyn arttyryp, elektr energııasyn, sý, jylý resýrstaryn tutynýdy qysqartýǵa baǵyttalǵan. Búginde Elbasy tapsyrmasymen bizdiń mınıstrlik smart-city kontseptsııasynyń standartyn jasaýmen aınalysyp jatyr. Osyǵan baılanysty 1,5 jyl buryn aqparattyń qoljetimdiligi týraly zań qabyldanǵan edi. Osy zańǵa sáıkes barlyq memlekettik organdar «Ashyq Úkimet» portalynda málimetterdi búkpesiz jarııalaýy tıis. Bul óz kezeginde smart-city boıynsha kóbirek tehnologııa engizýge múmkindik beredi. Almaty bıligi kólik júıesi boıynsha avtobýstardyń marshrýttary týraly aqparatty da jarııalap otyr. Arnaıy qosymshalar jasaldy. Adamdar qaı avtobýs qaı ýaqytta keletini, qaı avtobýsta adam az ekenin aldyn ala bilip otyrady», - dedi mınıstr.
Dáýren Abaev Elbasynyń densaýlyq saqtaý salasyndaǵy statsıonarlyq emdeýden profılaktıkaǵa kóshý týraly, salaýaty ómir saltyn nasıhattaý týraly mindetterin de tilge tıek etti.
«Eletkrondy medıtsınalyq kartochkalardyń arqasynda naýqastardyń barlyq emdelý tarıhyn bilýge bolady. Ol adam basqa jerge kóship ketse de málimetter bazasy saqtalady», - dedi mınıstr.
Aıta ketý kerek, búgin Almaty ákimi Baýyrjan Baıbek 2020 jylǵa taman qaladaǵy aýrýhanalardyń barlyǵy qaǵazbastylyqtan arylady degen bolatyn.
