Dáýlet Turlyhanovtyń uly 15 táýlikke qamaýǵa alyndy

ALMATY. Qazaqparat - Májilis depýtaty Dáýlet Turlyhanovtyń áskerdegi uly áskerı bólim bastyǵynyń buıryǵyna baǵynbaǵany jáne oryndamaǵany úshin ákimshilik jaýapkershilikke tartyldy, dep habarlaıdy QazAqparat tilshisi.

Almaty qalasynyń Ákimshilik quqyq buzýshylyq ister jónindegi mamandandyrylǵan aýdanaralyq sotynda áskerı bólim bastyǵynyń belgilengen tártippen berilgen buıryǵyn oryndaýdan ashyq bas tartý – ákimshilik quqyq buzýshylyq jasaǵan qatardaǵy jaýynger Nurasyl Bolatqa qatysty ákimshilik is qaraldy.

Sotta anyqtalǵandaı, 2 shildede áskerı bólimniń qatardaǵy jaýyngeri N.Bolat Almaty garnızony gaýptvahtasynan shyqqannan keıin komandırdiń buıryǵyna sáıkes óziniń áskerı bólimine barýǵa mindetti bolǵan. Alaıda ol oǵan bólimshe komandıriniń leıtenant A. bergen buıryǵyn oryndaýdan ashyq túrde bas tartyp, Áskerı polıtsııa basqarmasynyń ǵımaratyna kelgen avtokólikpen belgisiz baǵytta ketip qalǵan.

«Sot B.-ny Ákimshilik quqyqbuzýshylyq týraly kodekstiń 652-baby 6-bóliginde kózdelgen ákimshilik quqyq buzýshylyqty jasaǵany úshin kináli dep tanydy. Ol 15 táýlikke qamaýǵa alyndy», - dep habarlady sottan.

Sot úkimi zańdy kúshine engen joq.

Eske salaıyq, 2 shilde kúni Dáýlet Turlyhanovtyń Qonaev garnızonynyń áskerı bólimderiniń birinde merzimdi áskerı boryshyn ótep júrgen uly Nurasyl Bolat áskerı nysannan qashyp ketken bolatyn. Keıin ol tabylyp, qyzmet atqaratyn ornyna jetkizildi.

Nurasyl Bolat Almaty qalasynda zańger Anna Dmıtrıevıch pen onyń kúıeýi Oleg Chernovty soqqyǵa jyqty dep aıyptalýda.

Almaty qalalyq Polıtsııa departamenti atalǵan derekti QR Qylmystyq kodeksiniń 293-baby («Buzaqylyq») boıynsha sotqa deıingi tergeýdiń biryńǵaı tizilimine tirkedi.

Keıin sport qaıratkeri Dáýlet Turlyhanov balasynyń buzaqylyq áreketine baılanysty túsinik bergen edi. 4 shilde kúni májilismen ulynyń aınalasyndaǵy jaǵdaıǵa qatysty áleýmettik jelidegi jeke paraqshasynda post jarııalady.