Dáýlet Turlyhanov úleskerler muńyn kóterdi
ASTANA. KAZINFORM — Sońǵy eki jylda úlestik qurylys salasyndaǵy qylmystyq ister boıynsha 16 adam sottalyp, 300-den astam kompanııa ákimshilik jaýapkershilikke tartylǵan. Bul týraly Premer-Mınıstrdiń birinshi orynbasary Roman Sklıardyń atyna saýal joldaǵan Májilis depýtaty Dáýlet Turlyhanov aıtty.
«20 jyl ótse de, aldanǵan úleskerlerdiń máselesi tolyq sheshimin tappaı kele jatyr. Oǵan kóptegen saılaýshylardyń aryz-ótinishteri sebep bolyp otyr. Myńdaǵan qazaqstandyqtar jaýapsyz qurylys salýshylarǵa senim artyp, turǵyn úısiz qaldy. Onyń ishinde zeınetker de, turmysy nashar jáne kópbalaly otbasylar, jalǵyzbasty ana men múgedek jandar da bar. Búginde qolyndaǵy bar qarajatyn úıge salyp, ózderi páter jaldap júrgen halyq kóp. Qoldaǵy málimetke súıensek, sońǵy eki jylda úlestik qurylys salasyndaǵy qylmystyq ister boıynsha 16 adam sottalyp, 300-den astam kompanııa ákimshilik jaýapkershilikke tartylǵan. Jýyrdaǵy Úkimettiń keńeıtilgen otyrysynda Memleket basshysy úleskerlik qurylys problemasyna taǵy toqtalyp ótken bolatyn. Degenmen naqty jumys ázirge baıqalmaıdy», — dedi Májilis depýtaty.
Mysaly, onyń aıtýynsha, áli kúnge deıin qurylys kompanııalary azamattardy úıdi tómen baǵamen beremiz dep, aldap júr. Nátıjesinde aqsha da, ýáde etilgen «sharshy metr» de joq. Kóbinese qurylys salýshylardyń zańsyz áreketteri azamattardyń qarajatyn aldyn ala kelisilgen sharttar, ınvestıtsııalar sııaqty zańsyz basqa baǵytta jasalady.
«Astana qalasynyń aýmaǵynda 243 kóppáterli turǵyn úı kesheniniń qurylysy toqtap, oǵan 40 myńnan astam úlesker tartylǵan eken. Osy obektilerdiń árqaısysynyń qurylysyn aıaqtaý memlekettiń tikeleı qatysýyn talap etedi. Qurylys kompanııalardyń sany azaıǵanymen, negizgi problema ózgerssiz tur. Mysaly, astanamyzda «Satýrn-1,2,3,4», «Sofııa» sııaqty turǵyn-úı keshenderi aıaqtalmaǵan, al aıaqtalǵanynyń qujaty rettelmegen. Sonymen qatar «Dıana», „Onıks», «Asker-1», «Asker-2», «Hazar», «Oazıs» sııaqty ondaǵan jyldar boıy qujaty durystalmaı, áli kúnge deıin qajetti ınfraqurylymdar jasalmaǵan turǵyn-úıler jeterlik», — dedi Dáýlet Turlyhanov.
Májilis depýtatynyń aıtýynsha, qurylysty qabyldaý komıssııasynyń jumysyna qatysty da zań buzýshylyqtar bar. Bul turǵyn úı keshenderin paıdalanýǵa qabyldaıtyn kezde baıqalady. Jyldap kútip, ázer qoly jetken baspanany alǵannan keıin, azamattarymyz sheshilmegen problemalarmen sottyń tabaldyryǵyn tozdyrýda. Osylaısha, elimizdegi qurylys salasynda biraz máseleler týyndap otyr.
«Onyń ishinde jaýapsyz qurylys salýshylardyń sanynyń ósýi, úleskerlerdiń quqyqtaryn qorǵaýdyń tıimdi tetikteriniń bolmaýy, sondaı-aq, memlekettik organdar tarapynan qatań baqylaý men júıeli talaptyń bolmaýy bar. Osyǵan baılanysty, tez arada elimiz boıynsha úlken problema týdyryp otyrǵan qurylys kompanııalarynyń jáne onyń artynda turǵan myńdaǵan taǵdyrly otbasylardyń máselelerin sheshýdi suraımyz», — dedi ol.
