Dáýlet Muqaev «Ulttyq kıim» kúnin bekitýdi usyndy
ASTANA. KAZINFORM – Ulttyq kıimderimizdi ulyqtaý maqsatynda respýblıkalyq deńgeıde «Ulttyq kıim» kúnin bekitý qajet. Bul týraly Premer-Mınıstrdiń orynbasary Tamara Dúısenovanyń atyna saýal joldaǵan Májilis depýtaty Dáýlet Muqaev aıtty.
«Ulttyq kıim – ultymyzdyń ulylyǵyn ulyqtaıtyn, ulttyq kodymyzdy bildiretin aıshyqty kórsetkish. Ulttyq kıimderimizdiń mol murasymen maqtana alatyndaı elmiz. Basqa kıimderdi aıtpaǵanda, bir ǵana bas kıimniń qazaq halqynda 20-dan astam túri bar. Búginde ulttyq kıimizdi ózimiz emes, ózge elderde keńinen ulyqtalý ústinde. Áleýmettik jelide Qytaıda qazaq jigitiniń ulttyq kıimmen kóshede júrip eldiń nazaryna túsken vıdeosy 5 mıllıonǵa jýyq qaralym jınap, halyqtyń ystyq yqylasyna bólengen. Elde ulttyq kıimdi nasıhattaý tek bir rettik chellendjder men aktsııalarmen ǵana ulyqtalýda. Sońǵy ýaqytta jalpy halyq arasynda «Ulttyq sezim» jalpyulttyq aktsııasy bastalyp, el arasynda keńinen qoldaý taýyp keledi. Aktsııany zııaly qaýym ókilderi, jýrnalıster men blogerler, oqý ordalary qoldap, aptanyń ár jumasynda ulttyq naqyshtaǵy kıimderdi kıip júrgender qatary kóbeıdi. Osy aktsııany bastaǵan azamattarǵa erekshe alǵysymdy bildiremin. Ulttyq kıim mádenı maıdannyń negizgi qarýy, halyq sanasyna áser etýshi kúsh ekenin eskersek bul máselege ústirtin qaraýǵa bolmaıdy», - dedi depýtat.
Onyń atap ótýinshe, aldaǵy ýaqytta ulttyq naqyshtaǵy kıim kııý dástúrin tek Naýryzben, aktsııalarmen ǵana shektemeı, ony trendke aınaldyrý qajet.
«Máselen, baýyrlas qyrǵyz halqy bastarynan aıyr qalpaǵyn tastamaıdy. Soǵan qarap-aq, ony qyrǵyz ekenin jazbaı tanısyń. Tipti Joǵarǵy Keneshtiń ózinde depýtattary aıyr qalpaqtaryn kıip otyrady. Ol qala berdi ulttyq kıimderin saqtaý maqsatynda, 5 naýryzdy – Aıyr qalpaq kúni dep memlekettik deńgeıde bekitip, ıÝNESKO-nyń materıaldyq emes mádenı muralarynyń tizimine engizgen. Bundaı kún tek Qyrǵyzstanda ǵana emes álemniń Brazılııa, Ispanııa, Shotlandııa, Japonııa syndy alpaýyt elderinde bar. Kórshiles ózbek halqy da ala taqııasy men shapanyn kúndelikti kıedi. Sol sekildi sheshen halqy da eltiri bórigimen erekshelenedi. Biz de óz ulttyq kıimimizdi ózimiz kııýdi sánge aınaldyrmasaq, birtindep olardy basqalar ıemdenip ketýi múmkin. Sońynda shapanymyzdan aırylyp, qamshymyzdy ǵana ustap qalmaıyq», - dedi Dáýlet Muqaev.
Osy oraıda ol Úkimetke birqatar is-sharany qolǵa alýdy usyndy.
«Birinshiden – ulttyq kıimderimizdi ulyqtaý maqsatynda respýblıkalyq deńgeıde «Ulttyq kıim» kúnin bekitý. Bul kún mádenı qundylyqtarymyzdy keńinen nasıhattap, óskeleń urpaqty otanshyldyqqa tárbıeleýdiń negizi bolar edi. Ekinshiden – memlekettik qyzmetkerler men halyqqa qyzmet kórsetetin ortalyq qyzmetkerleriniń kıimderine qazaqı aıdentıka elementterin qosý. Úshinshiden – Ulttyq kıim óndiretin otandyq kásipkerlerge memleket tarapynan qoldaý kórsetip, bıznesti qoldaýǵa baǵyttalǵan granttarda ulttyq kıim kásibine basymdyq berý, halyq arasynda ulttyq kıimdi qoljetimdi etýge yqpal etip, suranysty arttyrý. Tórtinshiden - mektep oqýshylary kıetin ulttyq kıimder standartyn ázirlep engizý ári halyqaralyq túrli jarystarǵa baratyn azamattardyń formalaryna mindetti túrde ulttyq naqyshty beıneleý», - dedi Májilis depýtaty.
