Daýlardy medıatsııa arqyly sheshý baıaý qalyptasýda ári kútilgendeı nátıje bermeýde - Joǵarǵy sot tóraǵasy

ASTANA. 20 qarasha. QazAqparat - Daýlardy medıatsııa arqyly sheshý baıaý qalyptasýda ári kútilgendeı nátıje bermeýde.

Bul týraly búgin QR Sýdıalarynyń VІ sezinde Joǵarǵy sot tóraǵasy Qaırat Mámı aıtty. Kóptegen elderde medıatsııa ınstıtýty daýlardy sotqa deıin sheshýdiń tıimdi tásili retinde tanylyp otyrǵandyǵyn basa aıtqan ol: «Ókinishke oraı daýlardy medıatsııa arqyly sheshý baıaý qalyptasyp keledi jáne kútilgendeı nátıje bermeı otyr. Medıatsııa aıasynda qaralatyn azamattyq-quqyqtyq daýlardyń sany az. Qylmystyq-quqyqtyq sıpatta medıatsııa qylmystyq protsespen kózdelgen tatýlastyrý ınstıtýtyna aınaldy. Osylaısha is júzinde aıtarlyqtaı nátıjeni baıqap otyrǵan joqpyz», - dedi. Joǵarǵy sot tóraǵasynyń atap ótýinshe, medıatsııa týraly zańnyń qabyldanǵanyna 2 jyldan astam ýaqyt ótse de qoǵamnyń atalǵan ınstıtýttan kútken nátıjesi áli de oryn ala qoıǵan joq. Sonymen qatar qazirgi ýaqytta sottar taraptardyń medıatsııa rásimderine júginýine yqpal etetin is júrgizý tetikterine qol jetkize almaýda. Máselen, Germanııada medıatsııa máselelerimen shtattaǵy sýdıa aınalysady. Ol taraptarǵa sot barysynda istiń qalaı qaralatyndyǵyn túsindirip, olardyń tatýlasýyna barynsha yqpal etedi. «Mundaı tájirıbe qandaıda bir shyǵyndy qajet etpeıdi jáne ony Qazaqstanda tabysty qoldanýǵa bolady», - degen Q.Mámı Qazaqstanda tatýlastyrý ınstıtýtyn damytyp, engizip qana qoımaı, sonymen birge qoǵamdaǵy daýlardy sottan tys sheshý joldaryn qarastyrý qajettigin basa aıtty.