«Daýylda mert bolǵan sarbaz» — Eksgýmatsııa nátıjesi ólimniń shyn máninde neden bolǵanyn ashyp berdi
ASTANA. KAZINFORM — Sarbazdyń máıitine eksgýmatsııa jasalǵan, onyń qorytyndysy boıynsha áskerı mindetin óteýshi jigittiń ólimine qatysty tyń málimetter anyqtalyp otyr. Kazinform agenttiginiń tilshisi marqumnyń anasy Indıra Týǵanbaevaǵa habarlasqan edi.
«Byltyr 8 jeltoqsanda jasalǵan eksgýmatsııa qorytyndysy boıynsha pyshaqtalǵany anyqtaldy, al palatka pyshaqtamaıdy ǵoı (shatyrdyń temir jaqtaýy basyna tıip jaraqat alǵan). Balam saǵat 19:00–de qaıtys bolǵan, al daýyl saǵat 21:00–de bastalǵan. Daýyl boldy deıdi, biraq kelgen balalar daýyldyń bolmaǵanyn aıtyp jatyr», — dedi Indıra Týǵanbaeva.
Sondaı-aq, marqumnyń anasy áskerdegi balasynyń atyna nesıe alynǵanyn málim etti.
«Ofıtser aldymen moıyndamady, bankten qaǵazyn alǵannan soń moıyndady. Eki uıaly telefon jáne aqshalaı alǵan. Ofıtser bás tigýge qumar bolǵan. Balam 9 tamyzda (2022 jyl) qaıtys boldy, 10 tamyzda ofıtserdi jumystan shyǵaryp jibergen. Jelilerde, búkil jerde balamdy temekimen kúıdirgeni (8-9 jerden), tunshyqtyrǵany shyǵyp jatyr, ony saraptama qorytyndysy kórsetpedi. Óıtkeni, biz saraptamany 1,5 jyldan keıin jasattyq. Al temekimen kúıdirgenin balamnyń súıegin jýýǵa kirgen týǵan aǵam baıqaǵan, ony maǵan 2 aıdan keıin aıtty. Balamnyń denesin kórgen kezde sol jaq kóziniń kógergenin jáne moınynan izderdi baıqap, baqyryp jyladym, odan ári kúıeýim kórmeı-aq qoı dedi. Súıekti jýǵanda aǵam da, kúıeýim de balany tunshyqtyrǵanyn baıqaǵan, men olarǵa nege sol kezde aıtpadyńdar dedim», — deıdi ol.
Onyń aıtýynsha, ekinshi saraptamany ishki ister organdary júrgizgen, al sarbazdyń jaqyndary táýelsiz sarapshyny tartqan. Saraptamanyń qorytyndysy kórsetkendeı sarbaz aýrýhanaǵa ákelgende, saǵat 21:00–ge deıin qaıtys bolyp ketken. Marqumnyń ata-anasyna ótemaqy, memlekettik marapat usynylǵan.
«Bizge páter jáne 5 mln teńge aqshalaı bergisi keldi. Sonymen qatar qyzymdy oqýǵa túsirip, eki qyzyma shot ashyp, árqaısyna 1,5 mln teńgeden beremiz dedi, onyń bárinen bas tarttyq. Olar meniń úıim joǵyn, jaldap turatynymdy biletin edi. Marapattan da bas tarttyq», — deıdi I. Týǵanbaeva.
Osy oraıda biz istiń mán-jaıyn anyqtaý úshin Іshki ister mınıstrligine habarlasqan edik.
«Ońtústik» óńirlik qolbasshylyǵy qatardaǵy sarbaz A. Shahımovtyń qaıtys bolý faktisi boıynsha sotqa deıingi tergeý júrgizip jatyr. Sot saraptamalarynyń qorytyndylary arasynda birqatar qaıshylyqtyń bolýyna baılanysty qazirgi ýaqytta qosymsha komıssııalyq saraptama taǵaıyndaldy. Tergeý jalǵasady. A. Shahımovtyń ata-anasynyń dáıekteri tolyq kólemde tekseriletin bolady», — delingen vedomstvonyń jaýabynda.
Eske sala keteıik, 2022 jylǵy 9 tamyzda Ulttyq ulan sarbazy Almas Shahımov daýylda áriptesterin qutqaryp júrip qaıtys bolǵan dep aqparat taraǵan bolatyn.
QR Ulttyq ulan «Ońtústik» óńirlik qolbasshylyǵynyń baspasóz qyzmetiniń málimetinshe, qatardaǵy jaýynger A. Shahımov áriptesteriniń qaýipsiz orynǵa shyǵýyna kómektesip júrip ózi sońǵy bolyp shyqqan kezde, shatyrdyń temir jaqtaýy basyna tıip, jaraqat alǵan.
Ulttyq ulannyń aqparatyna sáıkes, jaýyngerdiń ata-anasyna zańnamaǵa sáıkes, 500 AEK (1 531 500 teńge) jáne 80 AEK (245 040 teńge) materıaldyq kómek kórsetilgen jáne marapatqa usynylǵan.
