Dástúrli sadaq atýda Aýstralııa Qazaqstan quramasyn jeńdi
ASTANA. KAZINFORM — Elordada V Dúnıejúzilik kóshpendiler oıyndarynda dástúrli sadaq atýdyń komandalyq jamby stılinde Aýstralııa komandasy Qazaqstandy jeńip, altyn júlde aldy. Ekinshi oryndy Qazaqstan toby, úshinshi oryndy — Reseı oljalady.
Komandalyq saıysqa 16 eldiń quramasy qatysqan. Komanda quramynda 3 er, 2 áıel sportshy bolady. Ár qatysýshyǵa 3 oqtan 1 múmkindik jáne 5 mınýt ýaqyt beriledi. Ár tıgen jebe úshin komanda enshisine 1 upaıdan jazylady.
Qazaqstan tobynda Ajar Tóleýqanova, Aıkórkem Batıhan, Qanat Qasymhan, Marat Beksultan, Maqsat Ábdikerimov óner kórsetip, fınalǵa joldama aldy.
Aýstralııada jamby stıli múldem joq, atyp ta kórmegen. Biraq ózderiniń mergendik qyryn jaqsy tanytty. Olar alǵashqy kúnderi alys qashyqtyqta nátıje kórsete almady, óıtkeni olar tek jaqyn qashyqtyqtardy kózdeıdi eken. Sol úshin jamby stıli olarǵa qolaıly keldi. Bizdiń jigitterdiń be baby jaqsy boldy, upaı jaǵynan da shamalas, tek baǵy jetpeı qaldy. Kúmis te jaqsy jetistik. Jalpy medaldik esepte Qazaqstan alda tur», — dedi Qazaqstan quramasynyń bas bapkeri Dıas Ahmetov.
Eske sala ketsek, saıystyń alǵashqy kúni Jánibek Qulmyrzaev Pýta nysanasyn kózdeýde altyn júlde jeńip alǵan edi.
Sonymen birge qazaqstandyq mergen Erbol Tápenov kúmis, Qanat Qasymhan eki qola jáne Aıkórkem Batıhan taǵy bir qola júldeni el qanjyǵasyna saldy.
Keshe «Jamby» nysanasy boıynsha Jánibek Qulmyrzaev pen Baqbergen Sálimov qola júldege ıe boldy.
