Dastan Sátpaev Qazaqstan quramasynyń aldaǵy 2 oıynyna qatyspaıdy

ALMATY. KAZINFORM – Qazaqstan quramasynyń shabýylshysy, «Qaırat» klýbynyń oıynshysy Dastan Sátpaev 2026 jylǵy álem chempıonatynyń irikteý kezeńindegi Lıhtenshteın jáne Soltústik Makedonııaǵa qarsy oıyndardan jaraqatyna baılanysty shet qaldy. 

«Qaırat» klýbynyń ardageri Quralbek Ordabaev 17 jastaǵy oıynshynyń ulttyq qurama matchtarynan tys qalýyna qatysty túsinik berdi.

– Keıngi match aldynda Dastan ózin jaısyz sezingen, biraq komandaǵa kómekteskisi kelip, eshkimge tis jarmaǵan. Soǵan qaramastan, ol oıyndy tolyq ótkizip, tipti gol da soqty. Alaıda matchtan keıin aýyrsyný kúsheıip, ol medıtsınalyq shtabqa júginýge májbúr boldy. Tekserý nátıjesinde sol jaq jambas bulshyqetinde shamamen 4 santımetrge jýyq isiný, sińirdiń sozylýy, mıkrojaryqtar anyqtaldy. Bul jas aǵza úshin aıtarlyqtaı júkteme, sondyqtan dárigerler oǵan klýb bazasynda qalyp, qalpyna kelý kýrsynan ótýdi usyndy, - dedi Ordabaev. 

Onyń aıtýynsha, klýb oıynshynyń jaǵdaıy týraly ulttyq quramanyń shtabyna resmı túrde habarlap, kelisim alǵan. 

– Ókinishke qaraı, bul joly Dastan ulttyq quramaǵa kómektese almaıdy. Jigitterimiz eshqashan quramadan bas tartpaıtynyn atap ótkim keledi. «Qaırat» fýtbolshylary úshin Qazaqstan namysyn halyqaralyq deńgeıde qorǵaý – árdaıym úlken mártebe men maqtanysh bolǵan. Sondyqtan dál qazir eń mańyzdysy – Dastannyń tolyqtaı saýyǵyp, jańa kúshpen oralýy. Ol áli de klýbqa da, ulttyq quramaǵa da kómek kórsete alady,  dedi Quralbek Ordabaev.

Aıta keteıik, Qazaqstan quramasy 10 qazanda Astanada Lıhtenshteınmen, al 13 qazanda syrt alańda Soltústik Makedonııamen kezdesedi.

Eske salaıyq, 30 qyrkúıekte almatylyq «Qaırat» óz alańynda madrıdtik «Realdan» 0:5 esebimen jeńilgen edi.