Daryndy jastarǵa Beıimbet Maılın atyndaǵy stıpendııa beriledi
Jazýshyǵa arnalǵan sharalar Beıimbet Maılın aýdanyndaǵy konferentsııamen bastaldy. Jıynǵa oblys ákiminiń orynbasary Marat Júndibaev, Qazaqstan Jazýshylar odaǵynyń tóraǵasy Ulyqbek Esdáýlet, Memlekettik tarıhı ınstıtýtynyń jetekshi ǵylymı qyzmetkeri Qundyzaı Erimbetova, «Egemen Qazaqstan» gazetiniń bas redaktory Aıbyn Shaǵalaq jáne basqa da zııaly qaýym ókilderi qatysyp, sóz sóıledi. «Beıimbet Maılınniń murasy – ulttyń asyl qazynasy» ǵylymı-praktıkalyq konferentsııasyn aqyn Aqylbek Shaıahmet júrgizdi.
«Bı-aǵańnyń artyna qaldyrǵan ádebı murasynyń qazaq ádebıetinde alatyn orny erekshe. Ol ár túrli janrda qalam terbep, ádebıettiń qyr-syryn jetik meńgerdi. Onyń óleńderi, prozalyq jáne dramalyq týyndylary ádebı shyǵarmalarǵa qoıylatyn joǵary talaptarǵa jaýap beredi. Sondaı-aq, ol qazaq jýrnalıstıkasynyń qalyptasýy men damýyna úles qosty. Bıyl 100 jyldyǵy atalyp jatqan «Egemen Qazaqstan» gazetiniń jaýapty hatshysy boldy. Muhamedjan Seralınmen birge «Aýyl» gazetiniń negizin qalady. Ómiriniń sońǵy jyldary «Qazaq ádebıeti» gazetinde redaktor boldy», - dedi oblys ákiminiń orynbasary.
Beıimbet Maılınniń dara tulǵasy ýaqyt ótken saıyn asqaqtap, onyń shyǵarmalary halyqtyń asyl qazynasyna aınaldy.
Eske salsaq, bıyl Qazaqstan Respýblıkasynyń Prezıdenti Qasym-Jomart Toqaevtyń jarlyǵymen Beıimbet Maılınniń esimi jazýshy týyp-ósken aýdanǵa berildi.
Marat Júndibaevtyń sózinshe, Bı-aǵanyń ádebı murasyn zerdeleý úshin jańa jobalar bastalady. Máselen, Qostanaı qalasynda jas ádebıettanýshy, synshylardyń qatysýymen jastar konferentsııasy ótedi.
«Osy jas ǵalymdarǵa Beıimbet Maılın atyndaǵy birjolǵy stıpendııany taǵaıyndap otyrmyz. Oblystyq mádenıet basqarmasyna aldaǵy ýaqytta osy stıpendııany turaqty negizde taǵaıyndap, onyń berilý tártibin ázirleýdi tapsyramyn. Sonymen qatar, oblystyq teatrlar sahnasynda Beıimbet Maılınge arnalǵan jáne onyń shyǵarmalary boıynsha spektaklder qoıý qajet», - dedi Marat Júndibaev.
Konferentsııa barysynda zııaly qaýym ókilderi, qalamgerler usynystaryn jetkizdi. Oblys ákiminiń orynbasary olardy eskerip, naqty is-sharalar josparyn qabyldaý qajettigin aıtty.
