«Daryn» memlekettik jastar syılyǵynyń ıegerleri anyqtaldy

ASTANA. KAZINFORM — Búgin «Daryn» memlekettik jastar syılyǵyn berý jónindegi konkýrstyq komıssııanyń qorytyndy otyrysy ótti. Komıssııa jumysyna Qazaqstan Respýblıkasynyń Mádenıet jáne aqparat mınıstri Aıda Balaeva qatysty. 

Bıyl syılyqqa 300-den astam úmitker usynylyp, olardyń 294-i komıssııada qaraldy.

Mádenıet jáne aqparat mınıstrliginiń málimetinshe atalǵan baıqaý jeńimpazdary «Ǵylym» nomınatsııasy boıynsha 64, «Dızaın jáne beıneleý óneri» – 19, «Sport» – 27, «Teatr jáne kıno» – 41, «Estrada» – 13, «Jýrnalıstıka» – 16, «Halyq shyǵarmashylyǵy» – 41, «Qoǵamdyq qyzmet» – 31, «Ádebıet» – 15, «Klassıkalyq mýzyka» – 27 úmitkerdiń arasynan tańdaldy.

Komıssııanyń quramynda 37 múshe boldy. Olardyń qataryna depýtattar, saıasatkerler, qoǵam belsendileri, mádenıet, óner, medıa jáne sport qaıratkerleri endi.

Aıda Balaeva komıssııa múshelerine atqarǵan qyzmeti úshin alǵys aıtyp, olardyń ádil jáne oń sheshim qabyldaǵanyna senim bildirdi.

Jeńimpazdardy marapattaý rásimi 25 qarasha kúni ótedi. «Daryn» memlekettik jastar syılyǵynyń laýreattaryna dıplom, tósbelgi jáne aqshalaı syıaqy tabystalady.

«Daryn» syılyǵy 1992 jyly talantty jastardy ǵylymı, shyǵarmashylyq, qoǵamdyq qyzmeti men sporttaǵy jetistikteri úshin memlekettik qoldaý maqsatynda qurylǵan. 

Aıta ketelik Respýblıka kúnine oraı Prezıdent atynan memlekettik nagradalar tabys etildi.