Dárigerlerdiń jalaqysy 200 myń teńgeden joǵary bolýy tıis - zertteý
Densaýlyqty damytý respýblıkalyq ortalyǵynyń dırektory Aınur Aıypxanovanyń aıtýynsha, dárigerlerdiń jalaqysy ortasha kórsetkishten tómen bolyp tur.
«Máselen, dárigerdiń ortasha jalaqysy 149 myń teńge eken. Aýrýxana qyzmetkerleri 136 myńdaı alady. Al alǵashqy medıtsınalyq kómek kórsetetin emxanalarda jalaqynyń kólemi 152 myń teńgeni quraıdy. Búginde alǵashqy kómek kórsetý qyzmetkerleri aýrýxanadaǵy áriptesterinen sál joǵary jalaqy alady. Sebebi búginde alǵashqy medıtsınalyq kómek kórsetýdi damytý sharalaryna basymdyq beriledi. Degenmen, onyń ózi tómen bolyp tur», - dedi A.Aıypxanova jýrnalısterge bergen suxbatynda.
Onyń sózine qaraǵanda, búginde damyǵan memleketterde dárigerlerdiń aılyǵy ortasha jalaqydan 2,5-3 esege artyq. Qazaqstanda ortasha jalaqydan da tómen.
«Biz qoıǵan maqsat boıynsha, 2019 jyly medıtsınalyq mekemelerdiń jartysynda dárigerdiń jalaqysy respýblıkadaǵy ortasha jalaqydan 1,5 esege joǵary bolýy qajet. Demek, dárigerlerdiń qazirgi ortasha jalaqysyna (149 myń teńgege - avt.) taǵy 50 protsent qosylýy qajet. Endi, qazirgi kezde aýraxana men emxanalardyń 80 protsenti jeke sharýashylyq úlgige kóshken. Bul degenimiz, dárigerlerdiń jalaqysyn mınıstr emes, bas dáriger sheshedi. Sondyqtan bas dárigerler qajetsiz shyǵyndardy azaıtyp, únemdelgen aqshany dárigerlerdiń jalaqysyna salýy qajet. Sosyn tegin medıtsınalyq kómek aıasyndaǵy aqshanyń kólemi ulǵaıady dep jatyr. Alda mindetti áleýmettik medıtsınalyq saqtandyrý bar. Bas dárigerler bunyń barlyǵyn tıimdi paıdalanyp, dárigerlerdiń jalaqysyn kótere alady», - dep atap kórsetti A.Aıypxanova.