Dárigerler qazaqstandyqtardy elektrondy temekiden bas tartýǵa shaqyrdy
«AQSh-ta elektrondy temekilerdi shekken adam óliminiń besinshi jaǵdaıy tirkeldi. AQSh Densaýlyq saqtaý mınıstrligi elektrondy temekiden paıda bolatyn belgisiz aýrýǵa baılanysty adamdardy odan bas tartýǵa shaqyrýda. Búgingi tańda veıpıngpen baılanysty tynys alý júıesiniń problemasymen emdeýge jatqyzylǵandardyń 500-den asa oqıǵasy tirkelgen. Aıryqsha taralǵan aýrý belgileri retinde jótel, keýdeniń aýyrsynýy, aýanyń jetispeýi, qaltyraý, bas aýrýy, esten tanyp qalý, dıareıa, anoreksııa, salmaq joǵaltý jaıttary tirkelýde. Bronhoskopııa bul aýrýdyń juqpaly emes ekendigin anyqtaýǵa múmkindik berdi. Rentgenogramma ókpeniń astyńǵy bóliginiń kúńgirttengenin, kompıýterlik tomografııa — ókpe alveolary úlpildeliginiń tómendegenin kórsetti», - delingen taratylǵan málimette.
Aıta keteıik, bastapqyda elektrondy temekiler men veıperler shylym shegýdi tastaýǵa nemese adamdar úshin zııandy ádettiń zalalyn tómendetýge kómektesetin qural retinde usynylǵan. Alaıda, sońǵy jyldary olar mektep oqýshylary men jastar arasynda tanymal bolyp ketti.
Veıptiń negizgi komponentteri retinde nıkotın, propılenglıkol - E1520 taǵamdyq qospasy, glıtserın, sý jáne ıistendirgishter (aromatızatorlar) qamtylǵan. Ǵalymdardyń baqylaýynsha, elektrondyq temekilerdi paıdalanatyn jastar keıinnen kádimgi temekilerdi jıi shege bastaıdy eken.
Búgingi tańda oryn alǵan jaǵdaılarǵa baılanysty búkil álemniń ǵalymdary Dúnıejúzilik densaýlyq saqtaý uıymymen birlesip elektrondyq temekilerdiń adam densaýlyǵyna tıgizetin zalalyn zerdeleýde.
«Osyǵan baılanysty Qoǵamdyq densaýlyq saqtaý ulttyq ortalyǵy qazaqstandyqtarǵa elektrondy temekilerden bas tartý múmkindigin qarastyrýdy usynady. Veıpterdiń býyn qaýipsiz dep sanaýǵa bolmaıdy. Onyń quramynda kantserogendermen birge aǵzany ýlaıtyn áleýetti zııandy qosyndylar men ýytty qospalar bar, sondaı-aq metall izderi nemese qyzdyrǵysh elementtiń, ne temeki qurylǵysynyń basqa bóliginiń belgileri bar. Budan basqa, devaıstar jarylyp, adamdy jaraqattaýy múmkin. Ortalyq salaýatty ómir saltyn ustanýǵa: durys tamaqtaný úlesin saqtaýǵa, tuz mólsherin kóp tutynbaı, sportpen aınalysýǵa, zııandy ádetterden bas tartýǵa shaqyrady», - deıdi uıym.
Eske sala keteıik, bıyl qazan aıynyń basynda AQSh-ta 14 adam elektrondy temekiniń qurbany bolǵanyn habarlaǵan edik.