Dárigerler Densaýlyq saqtaý mınıstrligine qymbat tomografııa apparatyn satyp alýǵa keńes berdi

ASTANA. QazAqparat - Respýblıkalyq dıagnostıkalyq ortalyq ıadrolyq medıtsına bóliminiń ınjener-fızıgi Serik Nurkenov Qazaqstandaǵy alǵashqy biregeı tsıklotron týraly aıtyp berdi, dep habarlaıdy QazAqparat tilshisi.

Mamannyń sózinshe, tsıklotron shyǵarǵan radıoaktıvti kapsýlalardy patsıentke berý arqyly aǵzadaǵy onkologııalyq aýrýlardyń oshaǵyn tabýǵa bolady.

«Osylaısha, onkologııalyq aýrýlardyń birinshi jáne ekinshi kezeńindegi dıagnostıka sapasy 40-70%-ke kóteriledi. Nátıjesinde ólim-jitim men aýrýdyń qaıtalaný kórsetkishi azaıady. Búginde respýblıka aýmaǵynda eki PET-apparat (pozıtrondy-emıssııalyq tomografııa) qana bar. Bul 18 mıllıon halyqtyń qajettiligin ótemeıdi. Barshamyzǵa belgili, onkologııada ýaqyt joǵary baǵalanady. Úlken kezekti nemese apparattyń isten shyqqanyn kórgen naýqastar bar qarajatyn jınap, dál osy tekseristen ótýi úshin shetel asady», - deıdi Serik Nurkenov «Nur Otan» partııasy Astana qalasy «Órkenıet» aýmaqtyq fılıalynyń partııalyq jıynynda.

Sondaı-aq, maman álemdegi jańa tehnologııalardyń onkologııalyq aýrýlardy anaǵurlym tıimdi emdeýge múmkindik beretinin atap ótti.

«Máselen, protondyq terapııa saý tinderge zaqym keltirmeı, qaterli isik jasýshalaryn ǵana sáýlemen emdeýge múmkindik beredi. Osylaısha, bul aýrýlardy emdeýdiń tıimdiligi men sapasyn arttyrýǵa bolady. Bul óte qymbat jáne aýqymdy qarajatty talap etedi. Biraq, bizdiń memleketke bul qurylǵylar asa qajet», - dep óz sózin túıindedi ol.

Sonymen birge, S. Nurkenov Nazarbaev Ýnıversıteti janynan jańa onkologııalyq ortalyqtyń qurylyp jatqanyn habarlady. Onyń qyzmeti erte dıagnostıkaǵa jáne túrli ıadrolyq baǵdarlamalarmen emdeýge baǵyttalady.