Dárigerler: Denıs Ten óte aýyr jaǵdaıda tústi, 3 lıtr qan joǵaltqan

ALMATY. QazAqparat - Almaty dárigerleri Denıs Tenniń jaǵdaıy qandaı ekendigin aıtyp berdi, dep habarlaıdy QazAqparat tilshisi.

Olardyń aıtýynsha, Denıs Ten aýrýhanaǵa óte aýyr jaǵdaıda túsken.

«19 shilde kúni saǵat 14:56-de Jedel járdem stansasyna Denıs Tendi pyshaqtap ketti degen habarlama tústi. Oqıǵa ornyna shuǵyl túrde dárigerler jetti. Patsıent Ortalyq klınıkalyq aýrýhanaǵa shuǵyl jetkizildi. Ol oń jaq sanynyń joǵarǵy tusynan jaraqat alǵan. San tamyrlary jaralanǵan», - dedi dárigerler.

Qazirgi tańda aýrýhanada osyǵan baılanysty túrli sala mamandarynyń konsılıým ótip jatyr.

«Jaǵdaıy aýyr, reanımatsııalyq sharalar júrgizilýde. Denıs 3 lıtr qan joǵaltqan», - dedi Densaýlyq saqtaý mınıstrliginiń baspasóz qyzmetinen.

Aıta ketý kerek, Denıs Ten búgin aýyr pyshaq jaraqatymen aýrýhanaǵa túsken bolatyn.