Dáriger Manar Smaǵul karantındi uzartýdyń paıdasy týraly aıtty

NUR-SULTAN. QazAqparat –QR Densaýlyq saqtaý mınıstrliginiń Almaty qalalyq Qoǵamdyq densaýlyq saqtaý ulttyq ortalyǵyna qarasty «Sanıtarııa-epıdemıologııa saraptama jáne monıtorıng ǵylymı-praktıkalyq ortalyǵy» fılıalynyń ınfektsııalyq jáne parazıttik aýrýlar basqarmasynyń basshysy Manar Smaǵul karantındi uzartý týraly sheshimge qatysty óz pikirin bildirdi, dep habarlaıdy QazAqparat tilshisi.

«Búgingi tańda koronavırýs ınfektsııasyna qarsy naqty aldyn alý sharasy joq (vaktsınatsııa sııaqty), sondyqtan barlyq aldyn alý sharalary taralý mehanızmin buzýǵa baǵyttalýy kerek. Karantınniń negizgi maqsaty – ınfektsııanyń taralýyn boldyrmaý. Infektsııa aýa tamshylary arqyly, ıaǵnı adam jótelgende, túshkirgende nemese sóılegende beriletindikten ınfektsııany taratýshy da adam», - dedi Manar Smaǵul telefon arqyly «QazAqparat» tilshisine.

Onyń aıtýynsha, bizdiń aınalamyzda naýqastanǵan adam paıda bolsa, jalǵyz mehanızm – qarapaıym aldyn alý erejelerin saqtaý.

«ıAǵnı, áleýmettik qashyqtyqty saqtaý jáne maska taǵý. Sharalardyń taǵy biri – karantın. Baılanysqan adamdardy oqshaýlaý qajet. Sebebi indetti taratýy múmkin eń qaýipti top – naýqaspen baılanysta bolǵandar», - dep atap ótti spıker.

«Koronavırýs órship ketken jaǵdaıda ınfektsııanyń taralýynyń aldyn alatyn jalǵyz shara – karantın. Ol ınfektsııanyń adamnan adamǵa berilmeýine kómektesedi», - dep tolyqtyrdy M.Smaǵul.

Avtory: Azamat Syzdyqbaev