Dáriger Dánııa Janaısova: Juqpaly dertterdiń ishinde eń qaýiptisi – koronavırýs
- Dánııa Qısaǵalıqyzy, dárigerlik – ómirde asa qajet mamandyqtyń biri. Sizdiń osy jolǵa túsýińizge ne sebep boldy?
- Dáriger bolýdy bala kezden armandadym. Ózim Jańaqala aýdany Kópjasar aýyldyq okrýgine qarasty Seıtqyzyl degen malshy aýylda dúnıege kelippin. Ákem Qısaǵalı Ekinshi dúnıejúzilik soǵysqa bes jyl boıy qatysqan.
Birneshe ret jaralanyp, gospıtalda emdelip shyqqannan keıin qaıtadan maıdanǵa attanyp otyrǵan. Qabyrǵasynan, jaǵynan oq tıip, urtyn tesip ótken. Qys kezinde urtynan bý shyǵyp turatyn.
1977 jyly Kópjasar aýylyndaǵy Dına Nurpeıisova atyndaǵy orta mektepti bitirgennen keıin kóp oılanbastan Aqtóbege tarttym. Arman-maqsatym oryndalyp, 1984 jyly Aqtóbe medıtsına ınstıtýtynyń emdeý isi fakýltetin támamdap, terapevt mamandyǵyn alyp, elge oraldym.
- Endeshe, eńbek jolyńyzǵa toqtala ketseńiz?
- Jańaqala aýdandyq aýrýhanasyna ınfektsıonıst dáriger bolyp baryp, 29 jyl boıy eńbek ettim. 1993-2003 jyldary aýrýhana dırektorynyń emdeý isi jónindegi orynbasary da boldym. 2013 jyly Oral qalasyndaǵy №3 emhana ınfektsıonısi bolyp ornalastym. 2014 jyldan beri №6 emhanadamyn.
Óz mindetime qosa qandaı qosymsha jumys berilse de, bar yntammen atqaryp júrdim. Dárigerdiń eń basty mindeti – adamdy emdeý, qıyndyǵy men qyzyǵy qatar júretin qyzmet qoı. Zembilmen kelgen naýqastyń emdelip shyǵyp, otbasyna qosylyp, alǵys aıtqanyn kórýden asqan qýanysh joq der edim.
- Túrli juqpaly aýrýlarmen kúres ǵasyrlar boıy jalǵasyp keledi. Qazir álemdi jaılaǵan koronavırýs indetiniń solardan ereksheligi qandaı?
- Arǵy ǵasyrdy aıtpaı-aq qoıaıyq. Óz basym dıfterııa, menıngıt, ish súzegi, dızenterııa, qyzylsha, tumaý, jelsheshek sekildi juqpaly dertterdi kórdim. Koronavırýstyń aıyrmashylyǵy, tez juǵyp, jyldam órshıdi, ýaqtyly emdelmese, ólimge soqtyrady. Derttiń tyrnaǵyna ilikken adamnyń burynǵy aýrýy bolsa, jaǵdaıy aýyrlaı túsedi.
Osy indet bastalǵannan beri emhana dárigerleri de tynym tapqan emes. Súzgiden ótkizý kezinde keńes berý, mobıldi topta júrgen dárigerlerdi baǵyttaý maǵan júktelgen. Adamzatty indetten ekpe ǵana qutqaratynyn taǵy da aıtqym keledi.
- Jalpy, №6 emhana qyzmet etetin Zachagan kenti boıynsha turǵyndardy egý jumystary qalaı júrip jatyr, ony da aıta ketseńiz?
- №6 emhana boıynsha osy kezge deıin 23 500 adam vaktsınanyń birinshi, sonyń ishinde 22 myńy ekinshi komponentpen egildi. Sondaı-aq 3 700 adam revaktsınatsııadan ótti. Oǵan qosa 890 adam Pfizer kompanııasynyń Comirnaty vaktsınasyn qabyldady. Bul vaktsınamen jasóspirimder, júkti jáne bala emizetin áıelder, múgedekter egilýde. Ekpeniń keri áserin kórgen joqpyz.
Emhana boıynsha tirkelgen turǵyndardyń 58 paıyzy ekpeden ótti. Halyq 80 paıyz egilse, indet toqtaıdy, tegisteı ekpe alsa, tolyq joıylady degen úmit bar. Óıtkeni qara ólim atalǵan sheshek aýrýyn da ekpe toqtatqany tarıhtan belgili. Osyndaı qıyn kezeńde indetti aýyzdyqtaý úshin el bolyp jumylyp jatqanda, dárigerlerge de saýlyq, amandyq tileımin.
- Sońǵy saýal, kóktem merekesine oraı barsha jurtqa, áriptesterińizge ne tilek aıtar edińiz?
- Kópten kútken kóktem merekesi qutty bolsyn! Uzamaı Ulystyń uly kúni – Naýryz meıramy da esik qaǵady. Olaı bolsa, kóktemmen birge el jańaryp, dala qulpyrsyn! Aspanymyzdan tynyshtyq, beıbitshilik ketpesin! Іndet joıylyp, baı-qýatty bolatyn kúnge birge jeteıik, aǵaıyn!
- Áńgimeńizge rahmet!
