Darıǵa Nazarbaeva jas jýrnalısterge keńes berdi
«Búginde jýrnalıstıkanyń aldynda turǵan eń basty syn-tegeýirin - memleket pen qoǵam arasynda moderator nemese medıator bola bilý. Bul búgin ǵana emes barlyq ýaqytta boldy, erteń de bola bermek. Asyra aıtqanym úshin keshirim suraımyn, sheneýnikterdiń «qus tilin» keń aýdıtorııaǵa jetkize bilý kerek. Eger sóz Qazaqstannyń densaýlyq saqtaý salasyn damytý baǵdarlamasy týraly bolsa, onda árbir adamǵa ol úshin neni bildiretindigin jetkize bilý qajet. Al eger bilim berýdi damytý baǵdarlamasy tóńireginde bolsa, onda árbir ata-anaǵa, árbir muǵalimge odan qoǵamnyń ne kútetindigin jáne baǵdarlama nege baǵdarlanǵanyn, aqshanyń qaıda baǵyttalatyndyǵyn jáne onyń qalaı jumsalatyndyǵyn jetkize bilý kerek», - dedi Senat deptýtaty. 
Sonymen qatar ol búginde qazirgi zaman adamynyń kúndelikti ómirin buqaralyq aqparat quraldarynsyz, jýrnalıstersiz elestetý múmkin emestigin basa aıtty.
«Sizder árbir adam ómirine tań atqannan qas qaarıǵanǵa deıin aralasyp, óz jumystaryńyzdy jasaısyzdar. Muny ózderińiz de túsine bermeýlerińiz múmkin. Jýrnalıst bolý - demek óz ýaqytyńnyń ar-ujdany bolý, kóp kórip, tyńdaý, bilý, túsiný, túsindire bilý jáne qazirgi zamannyń kúrdeli qubylystaryn qarapaıym tilmen, óte uǵynyqty túrde aýdıtorııaǵa jetkize bilý degen sóz. Bul kez kelgenniń qolynan kele bermeıtin óte úlken mindet», - dedi Darıǵa Nazarbaeva.
Buǵan deıin habarlaǵanymyzdaı, Darıǵa Nazarbaeva qazirgi tańda jýrnalıstıka kóp qyzyǵýshylyq tanytylatyn mamandyqtardyń biri ekendigin aıtqan bolatyn. 
Al QR Aqparat jáne kommýnıkatsııalar mınıstri Dáýren Abaev myqty jýrnalıst bolý úshin kóp izdenis, tájirıbe qajet ekendigin atap ótken edi.
Aıta keteıik, qazaqstandyq jýrnalıstıkany damytýǵa jas jýrnalısterdiń kásibı biliktiligin arttyrýǵa baǵyttalǵan keń aýqymdy «Jas qalam» jobasyna 100-den astam jýrnalıst qatysýda. Olardyń qatarynda jýrnalıstermen qatar jýrnalıstıka fakýltetiniń stýdentteri, sondaı-aq buqaralyq aqparat quraldaryna qyzyǵýshylyq tanytatyn jastar da bar.
