Dári-dármekke ótinimder elektrondy formatta túziledi

NUR-SULTAN. QazAqparat - Qazaqstanda dári-dármekke ótinimder elektrondy formatta túziletin bolady. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Densaýlyq saqtaý mınıstrligi Farmatsııa komıtetiniń tóraıymy Lıýdmıla Buırabekova aıtty, dep habarlaıdy QazAqparat tilshisi.

«Naýqastardy tegin ambýlatorııalyq qamtamasyz etý, dári-dármekti tıimdi josparlaý máselesin sheshý úshin mınıstrlik ótinimdi tolyqtaı elektrondy formatta túzý týraly sheshim qabyldady», - dedi ol.

Komıtet basshysynyń sózine qaraǵanda, búgingi kúni dıspanserlik naýqastardyń tirkelimin QR Densaýlyq saqtaý mınıstrligi Dári-dármekpen qamtamasyz etýdiń aqparattyq júıesimen jáne «SQ-Farmatsııa» biryńǵaı farmatsevtıkalyq júıesimen yqpaldastyrý aıaqtalǵan.

«Ótinimdi túzý protsesi bylaı júrgiziledi: tegin dárilik qamtamasyz etilýge tıesili naýqas esepke tirkelgen kezde nemese esepte turǵan naýqasqa dáriger mólsheri, sany jáne emdeý kýrsy kórsetilgen emdeý syzbalarynyń birin tańdaıdy. Emdeýdiń atalǵan syzbasyn bizdiń beıindi respýblıkalyq ǵylymı-zertteý ınstıtýty ázirlegen. Munan keıin emdeý kýrsyna qajetti dári-dármektiń sany avtomatty túrde qalyptastyrylyp, bıýdjetin bekitý úshin Densaýlyq saqtaý mınıstrligine jiberiledi. Atalǵan ótinimdi avtomatty túrde túzý taıaý kúnderi bastalyp, 15 mamyrǵa deıin aıaqtalady», - dedi Lıýdmıla Buırabekova.