«Dári-dármek ózimizde óndirile bastady» - baspasózge sholý
***
«Egemen Qazaqstan» gazetinde «Dári-dármek ózimizde óndirile bastady» degen maqala basyldy. Oblysta kásipkerliktiń kókjıegi keńeıip, ónerkásiptegi shaǵyn jáne orta bıznestiń úles salmaǵy jyl ótken saıyn artyp keledi. Sondaı-aq, kásipkerler bizdiń óńir úshin tyń salany ıgerýge talaptanyp, jańa ónimder óndirýdi qolǵa alýda. Budan birer jyl buryn «Veles Aktobe LTD» JShS dári óndiretin tseh ashyp, paıdalanýǵa bergen bolatyn.
- Buryndary dári-dármektiń basym bóligin alys-jaqyn shetelderden alyp keldik. Shymkenttegi jalǵyz farmatsevtıka zaýytynan basqa otandyq dári-dármek óndiretin óndiris orny joqqa tán bolatyn. Elbasy alǵa qoıǵan mindetterdi júzege asyrýdyń tıimdi bastamalary, tııanaqty jobalary ómirge joldama ala bastady. Bizdiń «Veles Aktobe LTD» JShS-iniń dári shyǵaratyn zaýyty osyndaı ıgi izdenistiń nátıjesinde ómirge kelgen kásiporyn. Bul osy seriktestiktiń «Aqtóbe» áleýmettik-kásipkerlik korporatsııasymen birigip júzege asyrǵan jobasy. Biz áýeli ótkizý rynogyna marketıngtik zertteý júrgizdik. Sonyń nátıjesinde biz shyǵaratyn dári-dármekterdiń suranysqa ıe ekenin baǵamdadyq. Óndiristik tehnologııany negizinen ózimiz jasadyq. Ónimderimizdi ázirge Aqtóbe, Batys Qazaqstan, Almaty, Shyǵys Qazaqstan oblystarynda ótkizýdemiz, alda elimizdiń barlyq qalalaryn qamtamasyz etýdi oılastyrýdamyz, - deıdi «Veles Aktobe LTD» JShS dırektory Gúlnár Imanalına.
***
«Aıqyn» gazetiniń jazýynsha, Qazaqstanda úı baǵasy arzandamaıdy. Qazirgi kezde quny tym aspandap ketken baspana baǵasy taıaý arada tómendeıdi dep kútken úısizderdiń úmiti eshqashan aqtalmaıdy.
«Qaıta jyl jyljyǵan saıyn onsyz da sharyqtap turǵan páter quny taǵy da ushyna beretin túri bar. Muny keshe elordada brıfıngte «Samuryq-Qazyna» jyljymaıtyn múlik qory» AQ basqarma tóraǵasy Bolat Palymbetov málimdedi. Eger eske túsirsek, osydan eki jyl aldyn Elbasy Astana men Almatydaǵy kóp qabatty úılerdiń baǵasy tym negizsiz qymbattap, Eýropanyń baǵasyna para-par deńgeıge jetkenin synap, tómendetý jónindegi eskertý jasaǵan edi. Ol ne boldy?», - dep jazady basylym.
- Biz tek qana úkimettik baǵdarlamalardyń esebinen halyqty baspanamen qamtý máselesin sheshe almaımyz. Jeke qurylysty damytý kerek. Tek qana úkimetke senip, úıde jatyp, arzan úı alamyn deý - durys emes. Shynyn aıtý kerek, endi arzan úı bolmaıdy. Arzan ıpoteka bolýy múmkin, arzan arenda bolýy múmkin, biraq úı arzandamaıdy. Astana men Almaty qalalaryn bylaı qoıǵanda, basqa qalalardaǵy eski «hrýşevkalardyń» ózi bir sharshy metri 500-600 dollardan túspeıdi. Óz úıi bolǵan soń, ony eshkim arzanǵa satpaıdy ǵoı. Al jańa úıdiń qymbat bolýyna birneshe sebepter bar. Máselen, bir sharshy metr turǵyn úıdiń baǵasyna salyq, qurylys materıaldarynyń quny, qurylysshylardyń jalaqysy kiredi. Arzandatý úshin osylardyń qaısysyn qysqartamyz? Bolashaqta Qazaqstan qurylys materıaldaryn ózinde shyǵarsa, baǵa arzandaıdy. Qazir biz áınekti, metall men lıftini shetelden alamyz. Osy rette Úkimet qurylysqa qajetti áınek zaýytyn salýǵa kirisip jatyr. Odan basqa da materıaldardy ózimizde shyǵarǵanda ǵana páter quny arzandaıdy.
Ol - ol ma, Astanada endi qarajaıaýlar mańyna da jolaı almaıtyn «Jasyl oram» atty qymbat oram boı kótermekshi. Ekologııalyq talaptyń negizinde salynatyn turǵyn úı kesheniniń jalpy quny 44 mlrd teńgeni quraıdy. 180 myń sharshy metr aýmaqty qamtıtyn joba EKSPO qarsańynda, ıaǵnı 2017 jyly paıdalanýǵa beriledi. Bir sharshy metriniń quny 2 myń dollardan kem bolmaıtyn páterler, negizinen, tek qaltalylarǵa arnalǵan. Muny Palymbetovtiń ózi qýattap otyr. «Bul áleýmettik baspana emes ekenin birden aıta keteıin. Sosyn meılinshe qymbat keshenge aınalady, ázirshe sharshy metri shamamen 2 myń dollardan asady. Degenmen eskerte keteıik, keıinnen turǵyn úılerdiń baǵasy negizinen, kommýnaldyq qyzmetter esebinen tómendep jatady. Al aıaqtalý merzimine kelsek, qazaqstandyqtar EKSPO qarsańynda jańa keshenge qonystanady. Jalpy, memlekette «Jasyl oram» jobasynyń qurylysyn qoldady, biz de onyń arzan bolmaıtynyn túsindik. Degenmen osy arqyly biz qurylys salasynda jańa ekologııalyq, halyqaralyq standarttarǵa kóshýge serpin bergimiz keledi. Al jańa tehnologııalardyń arzan bolmaıtynyn kópshilik biledi, eń bastysy, biz qurylys salasyna jańa ekologııalyq tehnologııany engizýge mindettimiz» deıdi Palymbetov. Osy jaıynda «Endi elde arzan úı bolmaıdy» atty maqalada tolyq berilgen.
Osy gazetti «Qytaıda qazaqtyń jeri bar» degen maqala berildi. Qytaıdyń qaq tórinde qazaq elshisiniń rezıdentsııasy boı kótermek. Keshe Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda osyndaı qyzyqty jańalyq jarııa etildi. Jıynda «Qazaqstan Úkimeti men QHR Úkimeti arasyndaǵy dıplomatııalyq ókildikterdiń ǵımarattaryn salý úshin jer ýchaskelerin ózara berý týraly» Kelisim jobasy qaraldy. Bul rette senatorlar Aspanasty elinde qazaq elshiligin salý kezinde «qupııalylyqty» saqtaý máselesin kóterdi.
Otyrysta baıandama jasaǵan Syrtqy ister mınıstriniń orynbasary Asqar Mýsınovtyń aıtýynsha, bul ekijaqty qujatqa 2013 jyldyń 7 qyrkúıeginde, QHR tóraǵasy Sı Tszınpınniń elimizge resmı sapary aıasynda qol qoıylypty.
***
«Ekspress-K» gazetinde «Nı serdtsa, nı mozgov» degen maqala jaryq kórdi. Búginde qorǵansyz balalardy soqqyǵa jyǵýdy beıne taspaǵa túsirý qaterli trendke aınalyp otyr. Internette osy tektes kezekti rolık paıda boldy, ıaǵnı jas jigit boksshynyń uryp soǵýǵa arnalǵan qaby retinde jasóspirimdi paıdalanǵan. Bul oqıǵa Pavlodar oblysynyń Jelezınka aýylyndaǵy agrarlyq-tehnıkalyq kolledjinde oryn aldy. Osy beıne túsirilimniń avtory jasóspirimge álimjettik kórsetýdiń sebebin de túsindirmegen.
