Dárigerler opıstorhoz dertiniń aldyn alatyn birneshe keńes berdi

Opıstorhoz – parazıttik jalpaq qurttardyń áserinen paıda bolatyn parazıttik aýrý. Ony adam shıki, az tuzdalǵan nemese jaqsy pisirilmegen ózen balyqtaryn jegen kezde juqtyryp alýy múmkin, dep habarlaıdy QazAqparat.

Opıstorhoz – osy ınfektsııany juqtyrǵan balyq arqyly beriletin eń kóp taralǵan jáne eń qaýipti gelmıntozdardyń biri.

Adam aǵzasyna engennen keıin bir aıdan keıin opıstorhıs jetilip, kóbeıe bastaıdy. Bir qurt táýligine 900-ge deıin jumyrtqa shyǵara alady.

Juqtyrǵan sátten bastap alǵashqy belgileri paıda bolǵanǵa deıin bir aptadan eki aıǵa deıin ýaqyt kerek. Ýaqyttyń mólsheri adamnyń ımmýnıtetine, ınfektsııany juqtyrǵan balyqpen birge asqazanǵa qansha dernásil engenine, sondaı-aq parazıttiń ómirlik tsıkline baılanysty bolady.

Aýrýdyń ınkýbatsııalyq kezeńi 2-iden 4 aptaǵa deıin, ortasha - 21 kún.

Jiti aýrýdyń aǵymy jáne onyń belgileri adamdarda ártúrli bolýy múmkin (jeńil, ortasha jáne aýyr).

Bastapqy kezeńde dene temperatýrasy shamaly 37,5 oS deıin joǵarylaıdy, dene álsizdenip, uıqy basyp, oń jaq qabyrǵa astynyń aýyrsynýy baıqalady.

Aýrýdyń ortasha aýyr aǵymynda jalpy ıntoksıkatsııa belgilerinen basqa, dene temperatýrasy 39 oS deıin kóterilip, júrek aıný, qusý, júıke qozýy, agressıvtilik, oń jaq qabyrǵa astynda basylmaıtyn aýyrsyný belgileri kezdesedi.

Opıstorhozdyń aýyr aǵymy kezinde teride esekjemge uqsas bórtpeler paıda bolýy múmkin.

Birte-birte aýrý sozylmaly túrge aýysady. Bul jaǵdaıda sozylmaly opıstorhoz baýyr men ót qabynyń zaqymdaný aýmaǵy keńeıgenshe uzaq ýaqyt boıy eshbir belgisiz ótetin kezderi de kezdesedi.

Sanıtarııalyq-epıdemıologııalyq saraptama ortalyǵy sarapshylarynyń derttiń aldyn alý keńesteri:

• jaqsy qaınatylǵan nemese jaqsy qýyrylǵan, ábden tuzdalǵan balyqty jeý;

• balyq jáne balyq ónimderin ónimniń sapasyn kýálandyratyn qujattary bar saýda oryndarynan satyp alý;

• tuzynyń tatymdylyǵyn anyqtaý úshin shıki balyq pen tartylǵan balyqty jeýge bolmaıdy;

• balyqty kesý tehnıkasyn saqtaý: shıki balyqty tazartý úshin jeke pyshaq, tabaq jáne kesetin bólek taqtaı bolýy kerek, ol ydystardy qoldanǵannan keıin muqııat óńdeý kerek;

• aýrýdyń belgileri paıda bolǵan kezde mindetti túrde medıtsınalyq kómekke júginý kerek.

Eger sizde Opıstorhozǵa qatysty suraqtaryńyz bolsa nemese qosymsha aqparat alǵyńyz kelse, QR PІB Medıtsınalyq ortalyǵynyń Sanıtarııalyq-epıdemıologııalyq saraptama ortalyǵyna habarlasyńyz.