Dárigerge sırek qaralatyn adamdardyń medıtsınalyq tarıfi 20 paıyz qysqarady
ASTANA. KAZINFORM – Áleýmettik medıtsınalyq saqtandyrý qory Astana qalasy boıynsha fılıalynyń dırektory Gúljan Shaıhybekova Astana qalalyq máslıhatynyń depýtattaryna 2026 jyly kúshine enetin jańa buıryqtyń saldary týraly málimet berdi.
- Keler jyly bizdi ne kútip tur? 2026 jyl – biryńǵaı paketke kóshetin jyl. Medıtsınalyq kómektiń negizgi kólemi medıtsınalyq saqtandyrýǵa kóshedi. Sáıkesinshe bizge halyqty barynsha medıtsınalyq saqtandyrý júıesimen qamtý kerek. Bizde Densaýlyq saqtaý mınıstrliginde jańa qabyldanǵan buıryq týraly jeke otyrys boldy. Ol buıryqta keıingi 12 aıdyń ishinde ózi bekitilgen emhanaǵa bas suqpaǵan árbir tulǵaǵa, ol bala bolsa da, eresek adam bolsa da, jan basyna shaqqandaǵy keshendi normatıv boıynsha 80 paıyz ǵana tarıf tóleý kózdelgen, ıaǵnı tarıf 20 paıyz tómendeıdi. Al emhana bekitilgenimen medıtsınalyq saqtandyrylmaǵan árbir turǵyn úshin tólenetin tarıf 10 paıyz tómendeıdi, - dedi ol.
Qor ókili ol sheshimniń qazirdiń ózinde qarjylandyrý boıynsha problemasy bar emhanalarǵa aýyr tıetinin aıtady.
- Mundaı sheshim ár emhana ózine bekitilgen patsıentterdi baqylaýyn kúsheıtsin degen nıetpen qabyldanyp otyrǵan shyǵar. Ekinshiden, densaýlyq saqtaý júıesi arqyly halyqty meılinshe kóbirek qamtý úshin qabyldanyp otyrsa kerek. Bizde 5-6 emhana bar. Olardyń halyqty qamtý kórsetkishi óte tómen. Qala boıynsha ortasha qamtý deńgeıi 83,6 paıyz bolsa, atalǵan emhanalarda qamtylǵan halyqtyń úlesi 76-80 paıyz kóleminde ǵana. Osyndaı emhanalar jyl aıaǵyna qaraı qarjydan tarlyq kórip qalýy múmkin. Al eger kredıtorlyq bereshegi bolsa, tipti artýy múmkin. Bul №8, №13, №14 emhana sııaqty mekemeler, - dedi Gúljan Shaıhybekova.
Máslıhat depýtattary bul buıryqtyń kúshin joıý máselesin Májilis deńgeıinde kóterý kerek degen baılamǵa keldi.
Biri mundaı buıryqty ár naýqasty emhanaǵa formaldy jolmen keltirý arqyly aınalyp ótýge bolatynyn aıtsa, ekinshileri dárigerlerdi óz mindetine kirmeıtin basy artyq sharýamen júkteýge eshkimniń haqy joq degen oı aıtty.
Aıta keteıik, 7 qazandaǵy Úkimet otyrysynda Premer-mınıstr Oljas Bektenov keler jyly turmysy tómen azamattar medıtsınalyq saqtandyrý júıesimen bıýdjet esebinen qamtylatynyn aıtqan edi.