Dárigerdi uryp, máıitti urlady: Kúdiktiler 12 jylǵa qamalýy múmkin

Almaty oblysynyń polıtsııasy Talǵar qalasynda medıtsına qyzmetkerlerin uryp-soqqan kúdikti eki adamdy ýaqytsha ustaý ızolıatoryna qamady, dep habarlaıdy QazAqparat tilshisi.

Almaty oblystyq Polıtsııa departamenti baspasóz qyzmetiniń basshysy Ernar Saıdıldın qylmystyq is qozǵalǵanyn atap ótti.

«QR Qylmystyq kodeksiniń 106-baby 2-bóligine sáıkes densaýlyqqa qasaqana aýyr zııan keltirgeni úshin múlki tárkilenip nemese 8 jyldan 12 jylǵa deıingi merzimge bas bostandyǵynan aıyrý jazasy qarastyrylǵan. Qylmystyq is oblystyq Polıtsııa departamenti basshylyǵynyń baqylaýynda. QR Qylmystyq is júrgizý kodeksiniń 201-babyna sáıkes ózge aqparat jarııa etýge jatpaıdy», - dedi Almaty oblysy PD baspasóz qyzmetiniń basshysy Ernar Saıdıldın.

Eske salaıyq, keshe Talǵar aýdandyq aýrýhanasynda ákesiniń qaıtys bolǵanyn estigen uldary medıtsına qyzmetkerlerine kúsh kórsetip, marqumnyń denesin urlap ketken.

Keıin Densaýlyq saqtaý mınıstrligi atalǵan oqıǵaǵa qatysty pikir bildirip, dárigerlerdi soqqyǵa jyqqandardy jazalaýdy talap etti.

Kóp uzamaı eki kúdikti ustalyp, polıtsııa bólimine jetkizilgeni málim boldy.