«Dáriger Talks»: shetel dárigerleri qazaqstandyq tájirıbeden úlgi alyp jatyr
ASTANA. KAZINFORM — «AMANAT» partııasy densaýlyq saqtaý salasynyń búgini men keleshegi týraly ashyq áńgimelesý maqsatynda elimizdiń barlyq óńirindegi 600-den astam dárigerdiń, medbıkelerdiń, ǵalymdardyń, medıtsınalyq uıymdar basshylarynyń jáne sarapshylardyń basyn qosty.
«Dáriger Talks» partııalyq dıalog alańynyń II otyrysyna qatysýshylar otandyq medıtsınada oryn alǵan júıeli máselelerdi talqylap, ony sheshý joldaryn usyndy jáne óz tájirıbelerimen bólisti.
Sóz basynda Májilis spıkeri, «AMANAT» partııasynyń tóraǵasy Erlan Qoshanov is-sharaǵa qatysýshylardy ótken Medıtsına qyzmetkeri kúnimen quttyqtady. Ol dárigerlerdiń el ómirindegi erekshe rólin atap ótip, densaýlyq saqtaý júıesin damytý máselesi árkez Memleket basshysynyń nazarynda ekenin jetkizdi.
— Prezıdent Qasym-Jomart Toqaev atap ótkendeı, medıtsına qyzmetkerleri, beıbit kúnniń batyrlary degen atqa laıyq. Búginde otandyq medıtsına jarqyn nátıje kórsetýde. Bizdiń dárigerlerimiz sanaýly memlekette ǵana qol jetimdi eń kúrdeli transplantatsııalyq otalar jasaıdy. «AMANAT» partııasymen birge alǵa qoıǵan arman-maqsattaryńyzǵa jetip, azamattarymyzdyń densaýlyǵy men turmysyn jaqsartý jolynda qaltqysyz qyzmet etip kelesizder. Bul — biz úshin asa mańyzdy, — dedi ol.
Májilis tóraǵasy medıtsına qaýymdastyǵynyń ókilderi «AMANAT»-tyń mańyzdy tiregi ekenin atap ótti. Sebebi árbir úshinshi medıtsına qyzmetkeri — partııa múshesi. Osy oraıda, «Dáriger Talks» platformasy otandyq medıtsınanyń ózekti máseleleri ashyq talqylanatyn jáne ony odan ári damytý boıynsha mańyzdy mindetter ázirlenetin biregeı alańǵa aınaldy. Máselen, ózekti taqyryptardyń biri — aýyldaǵy medıtsına qyzmetkerleriniń tapshylyǵy. Atalǵan máseleni sheshý maqsatynda aýyldyq jerge kóship barǵan 700-ge jýyq medıtsına qyzmetkerine byltyrdan bastap 100 ETJ (shamamen 9 mln teńge) kóleminde kóterme járdemaqy tólendi. Bul norma «AMANAT» partııasynyń saılaýaldy baǵdarlamasynda qarastyrylǵan edi.
Sondaı-aq depýtattyq korpýs pen Densaýlyq saqtaý mınıstrliginiń birlesken jumysy arqyly medıtsına qyzmetkerlerine biliktilik sanattaryn berýdiń jańa júıesi ózgertildi. Myńdaǵan dáriger men medbıke testileýsiz balamaly biliktilik deńgeıin aldy. Bul — medıtsına qyzmetkerleriniń partııaǵa joldaǵan kóptegen ótinishine jaýap retinde qabyldanǵan sheshim. Buǵan qosa, Májilistegi «AMANAT» fraktsııasynyń músheleri dári-dármekter men medıtsınalyq qyzmetterge 10% QQS engizýge qarsylyq bildirdi.
Prezıdent tapsyrmasy boıynsha dárigerlerdi kásibı saqtandyrý júıesi engizildi: budan bylaı dárigerdiń qateliginen oryn alǵan shyǵyndar mamandardyń jeke qarajatynan emes, bıýdjet esebinen jabylady.
Alaıda otandyq dárilik preparattarmen qamtamasyz etý, MÁMS júıesiniń ashyqtyǵy syndy birqatar másele áli de bar. Medıtsına qyzmetkerlerine qol jumsaý máselesi tolyq sheshilgen joq. Búginde medıtsına qyzmetkerleriniń kásibı qyzmetine ózge tulǵalardyń kedergi keltirýinen qorǵaıtyn normalar kúsheıtildi. Sonymen qatar «AMANAT» fraktsııasynyń músheleri dárigerlerge qatysty zorlyq-zombylyq jasaǵan adamdar úshin jeke qylmystyq jaýapkershilik qarastyrý máselesi boıynsha túzetýler engizýge bastamashylyq etti.
Sondaı-aq is-shara barysynda premer-mınıstrdiń orynbasary Ermek Kósherbaev jáne Densaýlyq saqtaý mınıstri Aqmaral Álnazarova sóz sóıledi. Al «Dáriger Talks» partııalyq dıalog alańyna qatysýshylar ózderiniń jeke qalyptasý tarıhymen bólisip, áriptesterimen birge kásibı syn-tegeýrinderdi talqylady.
Máselen, Qyzylorda qalasyndaǵy Kóp beıindi oblystyq aýrýhananyń № 1 terapııa bólimshesiniń meńgerýshisi, endokrınolog Elena Tshaı bolmashy gormonaldyq aqaýlardyń ózi kúrdeli másele týyndatýy múmkin ekenin, sondyqtan táýekeldi ýaqtyly anyqtap, em qabyldaı bastaý asa mańyzdy ekenin aıtty.
Qazaqstan medıtsınalyq týrızm qaýymdastyǵynyń prezıdenti Krıstına Krıvetstiń aıtýynsha, Qazaqstanda medıtsınalyq qyzmet quny damyǵan elderge qaraǵanda aıtarlyqtaı arzan, alaıda emdeý sapasy álemdik standarttarǵa saı keledi. Bul — elimizge keletin sheteldik medıtsınalyq týrıster úshin asa tartymdy. Jyl saıyn álemdegi 45 memlekettiń 10 myńnan astam azamaty em qabyldaý úshin Qazaqstanǵa arnaıy at basyn burady.
Jetisý oblysy Aqsý aýdanynyń jedel járdem feldsheri Saıat Myrzahanov dárigerdiń tabandylyǵy men tapqyrlyǵy qanshalyqty mańyzdy ekenin atap ótti. Máselen, jańbyr joldy shaıyp, kólikpen júrý múmkin bolmaı qalǵan kezde, Saıattyń atqa minýine týra kelgen edi. Osylaısha, ol naýqasqa ýaqtyly jetti. Aqtóbedegi M.Ospanov atyndaǵy Batys Qazaqstan medıtsına ýnıversıtetiniń radıologııa kafedrasynyń meńgerýshisi Erbolat Іztileýov adam papıllomavırýsyna qarsy ekpege nemquraıdy qaraýdyń qaıǵyly saldaryna nazar aýdardy. Semeıdegi perınataldyq ortalyqtyń neonataldyq blogynyń basshysy Gúljazıra Dúısekenova júktiliktiń 25-shi aptasynda dúnıege kelgen salmaǵy nebári 470 grammdy quraıtyn qyzdy dárigerler qalaı aman alyp qalǵanyn aıtty. Dárigerler 117 kún boıy náresteniń ómiri úshin kúresti.
Petropavl qalasyndaǵy Kópsalaly oblystyq balalar aýrýhanasynyń konsýltatıvtik-dıagnostıkalyq ortalyǵynyń meńgerýshisi Arlan Baltabekov apparattyq telemedıtsınany qoldaný barysyndaǵy jetistiktermen bólisti. Osy arqyly shalǵaı aýyldardyń turǵyndary oblys ortalyǵyna qatynamaı-aq tar beıindi medıtsınalyq kómekke qol jetkizip otyr. «Esen Foundation» qorynyń densaýlyq saqtaý salasyna qatysty jobalarynyń jetekshisi Leıla Ishbaeva Aqmola oblysy Tselınograd aýdanynda «Baquatty audan» pılottyq jobasyn júzege asyrýdyń aralyq qorytyndysyn usyndy. Osylaısha, mentorlyq júıeni engizý arqyly aýyldaǵy 300 mamannyń Astanadaǵy áriptesterimen tikeleı keńesý múmkindigi paıda boldy. Bul qadam sapaly áli jedel sheshim qabyldaý deńgeıin arttyryp jatyr.
Ortalyq klınıkalyq aýrýhanadaǵy neırohırýrgııa ortalyǵynyń jetekshisi Myńjylqy Berdiqojaev pen Almatydan kelgen neırohırýrg-dáriger Marat Sarshaev qazaqstandyq dárigerler frantsýz áriptesterin oqytyp jatqanyn málimdedi. Elimizdegi eń kóne aýrýhananyń neırohırýrgtary sheteldik áriptesterine sheberlik saǵatyn ótkizip, tikeleı efırde mıǵa asa kúrdeli eki ota jasady.
Kezdesý sońynda «AMANAT» partııasynyń tóraǵasy Erlan Qoshanov jáne Densaýlyq saqtaý mınıstri Aqmaral Álnazarova kásibı qyzmeti barysynda elge sińirgen eńbegi úshin birqatar medıtsına qyzmetkerin marapattady.
Aıta ketelik «Ańsaǵan sábı» arqyly 30 myń áıelge tegin EKO jasalǵany týraly jazǵan edik.