Dáriger, notarıýs, donor: Adam aǵzalaryn satýmen aınalysqan 22 adam ustaldy
Almaty oblysynyń Polıtsııa departamenti prokýratýranyń úılestirýimen adam aǵzalaryn alyp-satýmen aınalysyp kelgen qylmystyq topty quryqtady, dep habarlaıdy Kazinform.
Polisia.kz málimetinshe, Almaty qalasy, Almaty, Jambyl jáne Túrkistan oblystaryndaǵy uıymdasqan qylmysqa qarsy kúres qyzmetkerleri 22 fıgýrantty ustaǵan. Olardyń arasynda uıymdastyrýshylar, medıtsına qyzmetkerleri, notarıýs, retsıpıentter men donorlar bar.
Kúdiktiler retsıpıentter men donorlardy izdeý, jalǵan qujattardy resimdeý jáne ishki organdardyń transplantatsııasy boıynsha operatsııalardy uıymdastyrý mindetterin ózara bólisip, áreket etken.
Aǵzaǵa muqtaj adamdarmen kelisim somasy 6-10 mıllıon teńgeni quraǵan. Osyndaı faktilerdiń 8 deregi anyqtalǵan.
«Úsh negizgi uıymdastyrýshy qamaýǵa alyndy. Іzdestirý is-sharalarynyń nátıjeleri boıynsha kúdiktilerden aqsha, qujattama, tsıfrlyq tasymaldaǵyshtar jáne basqa da zattaı dáleldemeler tárkilendi.
«Halyq densaýlyǵy jáne densaýlyq saqtaý júıesi týraly» Qazaqstan Respýblıkasynyń kodeksine sáıkes transplantatsııalaý kezinde adam aǵzalary men tinderin alyp-satýǵa tyıym salynady.
QR QK-niń 116-baby boıynsha («Adamnyń aǵzalary men tinderin alyp qoıýǵa májbúrleý nemese zańsyz alyp qoıý») sotqa deıingi tergep-tekserý júrgizilip jatyr. Baptyń sanktsııasy múlki tárkilenip, 12 jylǵa deıin bas bostandyǵynan aıyrý túrindegi jazany kózdeıdi.
Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy», - delingen polıtsııa málimetinde.
