Dáriger eminiń nátıjeli bolýy medbıkeniń qyzmetine baılanysty

ALMATY. KAZINFORM – 12 mamyr — Halyqaralyq medbıkeler kúni. Medıtsına salasynda qyzmeti tómen bolsa da, atqaratyn róli joǵary medbıkeniń qadirin basy aýyryp, baltyry syzdaǵan kez kelgen adam túsinedi. Naýqasty dárimen ǵana emes, jyly sózben de emdeý kerek.

27 jyldan beri osy qyzmetin adal atqaryp kele jatqan Almaty qalalyq kardıologııalyq ortalyǵynyń aǵa medbıkesi Gúlzada Rahymbaeva osylaı dep oılaıdy.

Gúlzada Rahymbaeva Almaty qalalyq kardıologııalyq ortalyǵyna 27 jyl buryn medbıke bolyp jumysqa qabyldanǵan. Sodan beri úzdiksiz eńbek etip kele jatyr. Qazir ol reanımatsııa bóliminiń aǵa medbıkesi. Bar ǵumyryn medıtsına salasyna arnaǵan Gúlzada Rahymbaeva — óz ortasyndaǵy eń tájirıbeli maman, jastarǵa úlgi bolyp júrgen jan.

«Medıtsına salasyna degen qyzyǵýshylyǵym bala kúnimde paıda boldy. Óıtkeni, meniń anam feldsher bolǵan. Bul mamandyq meıirimdilikti, shydamdylyq pen eptilikti qajet etedi»,- deıdi ol.

Medbıkeniń aıtýynsha, medbıkelerdi tek dárigerdiń aıtqanyn oryndaýshy ǵana dep túsinýge bolmaıdy, olar — dárigerdiń senimdi seriktesi. Dáriger taǵaıyndaǵan eminiń nátıje berýi osy medbıkelerge baılanysty.

Ásirese, reanımatsııa bóliminde jumys isteıtin medbıkelerdiń arqalaǵan júgi aýyr. Olar kún saıyn ólim men ómirdiń arasyndaǵy adamdardyń aman qalýy úshin kúresedi. 

«Bul toptyq jumys. Tek kúsh biriktirý arqyly ǵana jaqsy nátıjege qol jetkizýge bolady. Dáriger terapııany taǵaıyndaıdy, biz bárin adal oryndaımyz. Ómir men ólim arasynda jatqan naýqastardy jiti baqylap, olardyń ómirge qaıta kelýine ýaqytpen sanaspaı, bar kúsh-jigerimizdi jumsaımyz», - deıdi medbıke.

Gúlzada Rahymbaeva ýaqytpen sanaspaı jumys isteıtinderin tilge tıek etti. 

«Bizdiń túski asqa belgilengen ýaqytymyz joq. Eger bizde patsıent kóp bolsa, onda túski úziliske shyqpaımyz. Es-tússiz qalyptaǵy naýqasty áriptesterimizben kezektesip qaraımyz», - dep atap ótti Gúlzada. 

Aıtýynsha, jaýapkershiligi mol reanımatsııa bóliminde 16 medbıke jumys isteıdi.