«Daraboz» jáne «Altyn qalam» úzdik balalar jazýshysyn birigip anyqtaıtyn boldy
Jıynda belgili bolǵandaı, bıyl ádebı baıqaýlar biriktirildi.
Bıylǵy baıqaý «Altyn qalam» baıqaýynyń sharttary boıynsha ótedi.
«Men ózim Prezıdent maqalasy shyqqanda qatty qýandym. Rýhanı jańǵyrý úshin álbette ulttyq ádebıetimizdi, mádenıetimizdi qoldaý, jańasha tynys berý mańyzdy. Ózim 10 jyl «Daraboz» baıqaýynyń uıymdastyrýshy boldym. Atalǵan baıqaýdyń arqasynda ádebıetke 11 jańa jazýshynyń esimin alyp keldik. Aldyńǵylarynyń eńbekteri kitap bolyp shyǵyp jatyr. Daraboz qaıda ketti dep surap jatqan adam kóp. Biz eshqaıda ketpedik. Daraboz úıirin tapty», - dedi jazýshy Sháken Kúmisbaev.
Onyń aıtýynsha, balalar taqyrybynda jazatyn jazýshylar Qazaqstanda saýsaqpen sanarlyq.
«Eń qıyny úlken jazýshylar balalar taqyrybyna jolamaıdy. Balalarǵa túsinikti etip jazý úshin balanyń tabıǵatyn túsiný kerek. Ol úshin baspa dırektory da, redaktory da, korrektory da balalar jazýshysy bolý kerek. Al, qazir baspalardyń kóbi kim aqsha berse, sony jazady. Qarap otyryp janyń ashıdy», - dedi Sh.Kúmisbaev.
Aıta ketý kerek, «Altyn qalam» baıqaýy boıynsha shyǵarmalar bıyl 8 atalym boıynsha synǵa túsedi. Jeńimpaz «Jersý» ınvestıtsııalyq-óndiristik korporatsııasy atynan 1 mln teńge kóleminde syılyq alady.
Sondaı-aq, bıyl Alash qozǵalysyna 100 jyl tolýyna baılanysty Alashorda taqyrybynda jazylǵan úzdik shyǵarma Esenqul Mamanuly atyndaǵy arnaıy syılyqqa ıe bolady.
Baıqaýǵa qazaq jáne orys tilinde jazylǵan shyǵarmalar aqpannan bastap qyrkúıektiń 15-ine deıin qabyldanady. 
