«Dara» qory men Nıý-Iork akademııasy qazaqstandyq stýdentterdi kıno ónerine baýlıdy

Nıý-Iork kıno óneri akademııasy men Almaty Menedjment ýnıversıteti bilim berý baǵdarlamalary salasynda yntymaqtastyq ornatty, dep habarlaıdy QazAqparat.

Almaty Management University (ALMA-U) jáne Nıý-Iork kıno óneri akademııasy (NYFA) bilim berý baǵdarlamalary salasyndaǵy yntymaqtastyq týraly kelisimge qol qoıdy.
«Dara» prezıdenttik bastamalar qorynyń qoldaýymen qol qoıylǵan qujat Qazaqstan men AQSh joǵary oqý oryndary arasyndaǵy ózara is-qımyldyń jańa bastaýy bolmaq. Kelisimniń mańyzdy bóligi - shyǵarmashylyq kásipter úshin bilikti kadrlardy daıyndaý jáne jasampaz ındýstrııany damytýdaǵy kúsh-jigerdi biriktirý.

Memleket basshysynyń Joldaýynda Qazaqstannyń jasampaz ekonomıkasynyń keń aýqymdy damýy úshin jaǵdaı jasaý mindetteri qoıylǵan.

«Óńirlerdi aralaǵanda únemi talantty, shyǵarmashyl azamattardy kezdestiremin. Olardyń elimizdegi jasampaz ekonomıkanyń keń aýqymdy damýy úshin óz áleýetin tolyq iske asyrýy úshin jaǵdaı jasaý mańyzdy», – dedi Qasym-Jomart Toqaev.

«Dara» Prezıdenttik bastamalar qory shyǵarmashylyq óndiristi qalyptastyrýǵa jáne elimizdiń daryndy jastaryn qoldap, damytýǵa erekshe kóńil bóledi.
Qazaqstan men AQSh oqý oryndarynyń ózara árekettestigi ınnovatsııalyq ekonomıkanyń, onyń ishinde jasampaz ekonomıkanyń qajettilikterin qanaǵattandyratyn talanttardy daıarlaý úshin úlken múmkindikterge ıe.
Qol qoıý rásimi Nıý-Iork akademııasynda ótti. Qujatqa «Dara» qorynyń ókilderi men NYFA basshylyǵy qol qoıdy.