Dári-dármekti qanshalyqty zańdy jolmen jasalǵanyn tekseretin qosymsha iske qosyldy

ASTANA. KAZINFORM — Tutynýshylar dúkennen azyq-túlik satyp alǵanda taýardyń sapasyna, shyqqan kúnine mán beredi. Al dári alǵanda onyń qashan jáne qanshalyqty zańdy jolmen jasalǵanyna kóńil bóle bermeıdi. Endi ony «Naqty ónim» mobıldik qosymshasy arqyly tekserýge bolady. Bar bolǵany dárilik zattaǵy belgini skanerleısiz. Ary qaraı sizge preparattyń qaı kúni, qaı elde shyqqany quramy, tipti sońǵy ret qaı dárihanada satylymda turǵanyna deıin kórsetiledi. Bul týraly Jibek Joly arnasynyń jańalyqtarynda aıtyldy. 

 — Bul jóninde men birinshi ret bilip turmyn sizderden. Negizi jaqsy boldy. Ásirese ata-analar úshin. Nege? Sebebi biz vıtamınder alamyz, dáriler alamyz, — deıdi Astana qalasynyń turǵyny Aıagóz Shoıynbaeva. 

Bul rette eskeretini — dárilerdi mindetti túrde tańbalaý osy jyldyń shildesinen bastaldy. Sondyqtan osy merzimge deıin shyǵarylǵan preparattarda aqparat ne kod bolmaýy múmkin.

— 2022 jyldan bastap dárilerge matrıks kod engizý bastaldy. Sol ýaqytta 90 dárilik preparat anyqtaldy. Bıyl barlyǵyna mindetteldi. Elge jetkizetin óndirýshiler men tasymaldaýshylar tańba basady, — deıdi Dárilik zattardy tańbalaý jáne qadaǵalaý jónindegi joba jetekshisi Anar Káribaeva. 

Tańba arqyly tekserý birinshiden — densaýlyq kepili. Ekinshiden — taýardyń qanshalyqty zańdy jolmen shyqqanyna jáne oǵan salyq tólengenine kýá bolasyz.

— Bizge, balabaqsha, mektep, jol kerek. Al onyń barlyǵy salyqtyń qarajatyna salynady. Sondyqtan bul jerde tutynýshy óziniń ǵana emes, memlekettiń de múddesin qorǵaıdy, - deıdi Memlekettik organdarmen ózara is-qımyl departamentiniń dırektory Nurlybek Isabekov.  

Qosymsha arqyly tutynýshy «halyqtyq baqylaý» júrgize alady. Eger taýarda tańba bolmasa nemese kod jalǵan bolyp shyqsa shaǵymdana alady. Baǵdarlama «E-ótinish» platformasymen ıntegratsııalanǵan. Birden ótinish memlekettik organdarǵa túsedi. Shaǵymdy anonımdi jazýǵa bolady.