Dári-dármek pen kazınodaǵy utysqa salynatyn salyq birdeı bolmaýy tıis —Ashat Aımaǵambetov
ASTANA. KAZINFORM – Májilis depýtaty Ashat Aımaǵambetov nelikten biz dári-dármekke, emdeý qyzmetterine, kitaptarǵa jáne kartadan kartaǵa aýdarymdarǵa 0% QQS usynǵanyn túsindirip ótti.
Bul týraly Ashat Aımaǵambetov áleýmettik jelidegi paraqshasynda jazdy.
— Salyq kodeksine qatysty bir top depýtattyń usynǵan túzetýleri týraly post jarııalaǵan soń, birqatar suraq kelip tústi. Ásirese nege dári-dármekke, medıtsınalyq qyzmetterge, kitaptarǵa jáne bank aýdarymdaryna QQS salmaý kerek degen suraqtar jıi qoıylady, — dep jazdy depýtat.
Ol dári-dármek pen emdeý qyzmetterine toqtalyp ótti.
— Biz aýyr, sozylmaly jáne ómirge qaýip tóndiretin kóptegen aýrý boıynsha dári-dármek pen emdeýge qazirgi 0% QQS mólsherlemesin saqtap qalýdy usynamyz. Mysaly: onkologııa, dıabet, sırek kezdesetin nemese aýtoımmýndyq taǵy basqa aýrýlar. Nege? Sebebi salyqtyń ósýi — baǵanyń ósýi. Al dári-dármektiń baǵasynyń ósýi — birinshi kezekte naýqastar men olardyń otbasylaryna aýyr salmaq. Bul jaı ǵana salyq máselesi emes, bul — adamgershilikke qatysty sheshim. Onko-dáriler men sırek aýrýlarǵa arnalǵan preparattardyń baǵasy qazirdiń ózinde óte joǵary. Eger olarǵa QQS engizilse — bul baǵanyń birden 10%-ǵa ósýi degen sóz, — dedi Ashat Aımaǵambetov.
Depýtat QQS-tan bosatý — mádenıetke, bilimge, ulttyq oıǵa kórsetilgen qurmet ekenin atap ótti.
— Otandyq kitaptar men anımatsııa. Kitapqa QQS salý — otandyq avtorlar úshin shyǵarylym qunyn arttyrady. Al bul — oqyrman úshin kitaptyń baǵasynyń kóterilýine ákeledi. Qazaq avtorlary nazardan tys qaldy dep aıtyp júrmiz — degenmen, sonyń ózinde kitapqa salyq salyp otyrmyz. QQS-tan bosatý — mádenıetke, bilimge, ulttyq oıǵa kórsetilgen qurmet. Biz óz avtorlarymyzdy, aýdarmashylarymyzdy, sýretshilerimizdi qoldaýymyz kerek. Sol sııaqty anımatsııa da — endi damyp kele jatqan sala. Qazaq tilindegi sapaly mýltfılmder óte az. Bul salany salyqpen emes, naqty qoldaýmen kóterýimiz qajet, — dedi ol.
Ashat Aımaǵambetov eger banktik aýdarymdar men kartochka arqyly tólemderge QQS engizilse — halyq kúndelikti qoldanyp júrgen qarapaıym qyzmetter qymbattap ketýi múmkin ekenin aıtty.
— Qarjylyq qyzmetter. Kóptegen elde bank qyzmetterine QQS salynbaıdy — bul jaıdan-jaı emes. Bizde de qazirgi tańda bul qyzmetter QQS-tan bosatylǵan. Eger banktik aýdarymdar men kartochka arqyly tólemderge QQS engizilse — halyq kúndelikti qoldanyp júrgen qarapaıym qyzmetter qymbattap ketýi múmkin. Mysaly, siz Halyq banktegi kartańyzdan Kaspi-ge aqsha aýdardyńyz — 200 teńge komıssııa tóledińiz. Eger oǵan QQS qosylsa, taǵy 32 teńgege deıin qosylýy ábden múmkin. Bul, ásirese, jıi aýdarym jasaıtyndar úshin aýyr. Zardap shegetinder — qarapaıym halyq: stýdentter, ata-analar men shaǵyn kásip ıeleri, — dedi Ashat Aımaǵambetov.
Dári-dármekke salynatyn salyq pen kazınodaǵy utysqa salynatyn salyq birdeı bolmaýy tıis.
Sondyqtan biz mynalardy da usyndyq:
— býkmekerlik keńseler men kazınolarǵa salyqty kóterý,
— transmaı qosylǵan ónimderge aktsız engizý,
— bankterge salynatyn korporatıvtik tabys salyǵynyń mólsherlemesin arttyrý.
— Másele «bárin bárinen bosatýda» emes. Másele — ádil ári teńgerimdi salyq júıesin qalyptastyrýda. Talqylaý áli jalǵasyp jatyr. Usynystar kóp: QQS-qa tirkeý shegine, salyq mólsherlemelerine, túrli salalarǵa qatysty. Árıne, árkim ózine tikeleı áser etetin máselege nazar aýdarady — bul týraly da jazyp otyramyz. Eń bastysy — osy usynystar jumys toby men Májiliste bolashaqta qaralyp, aldaǵy ýaqytta qoldaý tabady dep úmittenemiz, — dep jazdy ol.
Aıta ketelik Ashat Aımaǵambetov MÁMS týraly másele kótergen bolatyn.