Dańqty traktorshy Kámshat Dónenbaeva týraly kitap jaryq kórdi
Qostanaı oblystyq fılarmonııasyna jıylǵan halyqtyń qarasy qalyń. Sebebi, búgin munda dańqty traktorshy KámshatDónenbaeva týraly kitap pen derekti fılmniń tusaýy kesildi. Jıynǵa Kámshat Baıǵazyqyzynyń uly men jeńgesi, kóz kórgen zamandastary keldi. Qostanaı oblysynyń ákimi Arhımed Muhambetov Eńbek Eriniń kisilik qasıetterin eske saldy.
«Kámshat Baıǵazyqyzynyń beınesi júregimize máńgi saqtalady. Ol kisi júrgen jerinde halqymyzdyń amandyǵyn tilep otyratyn. Tyń ardageri, ardaqty ana qoǵamdyq jumystardan qalys qalmady. Tipti, 2016 jyly oblystyq meshtti ashqanda sonyń basy-qasynda júrdi. Elbasynyń Joldaýyn turǵyndarǵa túsindirý kezinde de Kámshat apanyń sińirgen eńbegi ushan-teńiz. Bir ereksheligi, apamyz basynan aq oramalyn tastamady. Ol kisini ǵasyrda bir týatyn tulǵalardyń biri dep esepteımin. «Taýlardyń bıiktigi alystaǵan saıyn bilinedi» degen qazaqta ádemi sóz bar. Osy sóz apamyzǵa arnalyp aıtylǵandaı. Kámshat Baıǵazyqyzynyń esimi eshqashan umytylmaıdy», -dedi oblys basshysy.
Arhımed Muhambetov kóktemde Qostanaı qalasynda Kámshat Dónenbaeva atyndaǵy saıabaq ashylatynyn aıtty. Qazirgi ýaqytta ataqty mehanızatordyń bıýsti jasalyp jatyr. Sondaı-aq, Arhımed Muhambetov «Kámshat» kitabynyń avtorlaryna alǵysyn bildirdi.
«Kámshat» kitaby avtorlarynyń biri - belgili jýrnalıst Qydyrbek Qıyshan. Onyń sózinshe, kitapta Kámshat Baıǵazyqyzy týraly estelikter toptastyrylǵan.
«Estelik kitap Kámshat anamyzdyń jeke muraǵat materıaldary, týystary men zamandastyrynyń materıaldary, birneshe kórkem shyǵarmanyń negizinde qazaq jáne orys tilderinde jaryq kórdi. Kirispe betinde Elbasynyń Kámshat Dónenbaevaǵa aıtqan lebizi jazylǵan. Kitaptyń taralymy - 500 dana. «Izdatelskıı dom» baspasynan jaryq kórdi. Endi oblys kitaphanalary men mektepterine taratylady.
Aıta keteıik, Kámshat Dónenbaeva 1943 jyly Qostanaı oblysy Uzynkól aýdany Lenın sovhozynda týǵan. Eńbek jolyn Uzynkól elevatorynda bastady. 1961 jyldan Qostanaı oblysy Borovskıı aýdany «Harkovskıı» sovhozynda mehanızator bolyp eńbek etken. Osy oblystyń Meńdiqara aýdanyndaǵy «Kamensk-Ýralskıı» keńsharynda mehanızatorlar daıyndaıtyn kýrsty, keıin Qostanaı aýyl sharýashylyq tehnıkýmyn syrttaı oqydy. «Ardagerler uıymy» respýblıkalyq qoǵamdyq birlestigi Ortalyq Keńesiniń múshesi, Oblystyq áıelder isi jónindegi jáne otbasy-demografııalyq komıssııanyń quramynda birneshe qyzmetterdi atqardy. 1980-1985 jyldary KSRO Joǵaryǵy Keńesiniń Ulttar Keńesi tóraǵasynyń orynbasary boldy. 1976 jyly KSRO Memlekettik syılyǵynyń laýreaty. Eki ret Lenın ordenimen, Qurmet belgisi ordenimen marapattalǵan. 1990-1993 jyldary osy keńsharda qaýipsizdik tehnıkasynyń ınjeneri, 1993 jyldan sharýa qojalyǵyn basqardy. Qostanaı oblysynyń jáne Qostanaı qalasynyń qurmetti azamaty.
