Danııar Eleýsinov ZUFFA jobasy boıynsha synǵa túsedi

ASTANA. KAZINFORM - Kásipqoı boksshy Danııar Eleýsinov Kazinform tilshisine aldaǵy jospary jóninde áńgimelep berdi.

Jaqynda Danııar Eleýsinov AQSh-tyń Vashıngton qalasynda fılıppındik Djeıms Bekonmen (26-5, 17 KO) sheberlik baıqasty. Jartylaı orta salmaqta ótken básekede otandasymyz qarsylasyn ekinshi raýndta tehnıkalyq nokaýtpen tize búktirdi. Danııar kásipqoı rıngtegi on úshinshi jeńisine qol jetkizdi.

- Bul kezdesýde fılıppındik boksshymen sheberlik baıqastym. Jekpe-jek segiz raýndqa josparlanǵan edi. Ekinshi raýndta oǵan joıqyn soqqym tıip, jekpe-jek nokaýtpen aıaqtaldy. Oǵan tehnıkalyq jeńilis jazyldy. Qysqasy, kezdesý oıdaǵydaı ótti dep oılaımyn.

Kezdesýge tyńǵylyqty daıyndyq júrgizdim. Ol AQSh-tyń Pıtsbýrg qalasynda ótti. Barlyq talapty saqtap, jekpe-jekke tolyqtaı daıyn boldym. Bapkerdiń sheshimine qulaq asyp, qarsylasymdy jan-jaqty zertteýge kóńil bóldim. Bul jekpe-jek barysynda tıimdiligin kórsetti, - dedi kásipqoı boksshy.

Qazir Danııar amerıkalyq tájirıbeli boks mamany Tomas ıAnkellomen jumys jasap jatyr. Ol kishi Roı Djons sekildi kóptegen bylǵary qolǵap sheberin daıyndaǵan.

- Qyrkúıek aıynda AQSh-ta taǵy bir márte jekpe-jek ótkizýdi kózdep otyrmyn. Odan keıin kelesi jyldyń basynda ZUFFA jobasy alǵashqy kezdesý bolady. Onda UFC sekildi tájirıbeli bylǵary qolǵap sheberleri jınalǵan. Bul kásipqoı mansabymdaǵy jańa belestiń biri dep oılaımyn. Sondyqtan qyrkúıektegi jekpe-jegim ZUFFA jobasyna daıyndyq retinde baǵalanady, - dedi Danııar.