Danııar Eleýsinov kandıdat Amankeldi Taspıhovtyń shtabynda boldy

NUR-SULTAN. QazAqparat - Qazaqstandyq sportshy Danııar Eleýsinov QR Kásipodaqtar Federatsııasynan Prezıdenttikke úmitker Amankeldi Taspıhovtyń respýblıkalyq qoǵamdyq shtabynda boldy, dep habarlaıdy QazAqparat QR Kásipodaqtar federatsııasynyń baspasóz qyzmetine silteme jasap.

Kezdesý barysynda prezıdenttikke úmitker men Olımpıada chempıony úlken sport týraly pikir almasyp, ómirlik ustanymdarymen, bolashaq josparlarymen bólisti.

Jas sportshy Danııar Eleýsinov búginde Qazaqstannyń sporttyq jetistikterin arttyryp, eń tanymal álemdik arenalardyń tuǵyryn baǵyndyryp júr. 27 jastaǵy boksshynyń qorjynynda jeti shaıqastan jeti jeńis bar. Jeti jekpe-jektiń tórteýi - AQSh-ta, ekeýi - Ulybrıtanııada, bireýi Monakoda ótken.

Sportshy kandıdattyń saılaýaldy tuǵyrnamasynyń negizgi baǵyttarymen tanysa otyryp, kásipodaqtyń kóptegen qundylyqtarynyń, sonyń ishinde qaýipsizdik tehnıkasyn saqtaý, komanda múshelerimen ujymdyq eńbek shartyn jasaý jáne taǵy basqa máseleleriniń mańyzyn atap ótti.

Kezdesý sońynda ekeýi bir-birine sáttilik pen jeńis tiledi. Aıta keteıik, Amankeldi Taspıhov pen Danııar Eleýsinov - jerlester, ekeýi de - Batys Qazaqstan oblysy, Kaztalov aýdanynyń týmasy.