Danııar Aqyshev: Inflıatsııa 5-7 paıyzdyq dálizde saqtalady
Danııar Aqyshevtyń aıtýynsha, ınflıatsııa 2018 jyldyń qańtar-qyrkúıeginde 3,3 paıyz bolǵan. Bul ótken jylǵy osyndaı kezeńdegi kórsetkishterden tómen. Jyldyq ınflıatsııa ótken jyldyń sońyndaǵy 7,1 paıyzben salystyrǵanda qyrkúıekte 6,1 paıyzǵa deıin tómendegen.
Aǵymdaǵy jyly ınflıatsııa 5-7 paıyzdyq nysanaly dálizde saqtalady. 2019 jyly ınflıatsııa Ulttyq Bank osyǵan deıin baǵalaǵannan góri baıaý tómendep, 4-6 paıyz jańa nysanaly dálizdiń joǵary shegine jýyq qalyptasady. Bul syrtqy jáne ishki faktorlardan týyndaǵan ınflıatsııalyq kútýlerdegi belgisizdiktiń ósýine baılanysty», - dep atap ótti Qazaqstan Ulttyq bankiniń basshysy.
D.Aqyshevtyń aıtýynsha, halyqtyń pikirin jınaý nátıjesi boıynsha bir jyl alǵa kútiletin ınflıatsııany sandyq baǵalaý shildedegi 5,6 paıyzben salystyrǵanda qyrkúıekte 6,4 paıyz bolǵan. Uzaq merzimdi perspektıvada tómendeý úrdisine qaramastan, ınflıatsııalyq kútimder qysqa merzimdi kezeńde áli de turaqsyz. Inflıatsııany basqarýdy arttyrýda ony 2019 jylǵy nysanaly dálizde saqtaý úshin qazirden bastap sharalar qabyldaý qajet.
«Ulttyq bank keshe bazalyq mólsherlemeni 9-dan 9,25 paıyzǵa deıin arttyrý týraly sheshim qabyldady. Bazalyq mólsherlemeniń jańa deńgeıi teńgemen aktıvterge suranysty arttyrýǵa jáne qolaıly aqsha-kredıt talaptaryn saqtaýǵa múmkindik beredi», - dedi Bank basshysy.
Onyń aıtýynsha, tamyzda ónerkásip ónimi kásiporyndary baǵasynyń artýy jyldyq kórsetýde 24 paıyz bolǵan. Taý-ken óndirý salalary óniminiń qymbattaýy jyldyq kórsetýde 37,5 paıyzǵa jetip, bul munaı baǵasynyń ósýinen bolyp otyr. Soǵan qaramastan, ónerkásiptegi baǵa dınamıkasy 6-12 aı sheginde tutynýshylyq ınflıatsııaǵa qysym kórsetýi múmkin.
«Valıýta naryǵynda teńge baǵamy jyl basynan bastap 15 qazan aralyǵynda 11,3 paıyzǵa álsirep, bir AQSh dollary úshin 369,98 teńgeni qurady. Teńgeniń álsireýi syrtqy faktorlarǵa baılanysty boldy. Birinshiden, bul AQSh dollarynyń damýshy elderdiń valıýtalaryna qatysty nyǵaıýy. Ekinshi faktor - Reseıge qarsy sanktsııalardyń bolashaqta qatańdatylýy týraly málimdeý. Osy turǵydan Reseı rýbliniń álsireýi jyl basynan beri 15 paıyz boldy. Ulttyq Bank shekterdi, dálizdi nemese basqa da baǵdardy belgilemeı, ózgermeli aıyrbastaý baǵamy saıasatyn júrgizýin jalǵastyrady», - dep atap ótti Danııar Aqyshev.