Danııada 24 naýryzda parlament saılaýy ótedi

ASTANA. KAZINFORM — Premer-mınıstr Mette Frederıksen Danııada parlament saılaýy 24 naýryzda ótetinin jarııalady, dep habarlaıdy AZERTADJ.

Zańnamaǵa sáıkes daýys berý 31 qazannan keshiktirilmeı ótkizilýi tıis. Alaıda mandattardy bólýdiń ıkemdi júıesine baılanysty naqty kúnin úkimet basshysy belgileıdi.

Sotsıal-demokrattar, Lıberaldar jáne «Moderaterne» (Ýmerennye) partııasy qatysatyn partııaaralyq negizde qurylǵan bıleýshi koalıtsııa Grenlandııa tóńiregindegi daǵdarys aıasynda qoǵamdyq pikirde óz ustanymyn nyǵaıtty.

Parlamentte sóılegen sózinde M. Frederıksen úkimettegi áriptesterine alǵys aıtyp, qol jetkizilgen nátıjelerdi atap ótti.

Saılaýaldy naýqannyń negizgi taqyryptary retinde zeınetkerlik jasty arttyrý jáne sotsıal-demokrattar usynǵan jańa baılyq salyǵyn engizý máseleleri qarastyrylady dep kútiledi.

Sonymen qatar, naýryz aıynda Danııa koroldiginiń avtonomııalyq bóligi — Farer araldarynda da saılaý ótkizedi. Onda daýys berý 26 naýryzǵa belgilengen.

Buǵan deıin Danııada jyl saıynǵy ulttyq tótenshe jaǵdaılarǵa daıyndyq aptasy engiziletini málim boldy. Bul apta qoǵamnyń barlyq músheleri óz rólin túsinip, tótenshe jaǵdaılarǵa daıyndyqty tereńirek túsinýine kómektesedi.