Digital Qazaqstan: munaı men generatsııa biryńǵaı tsıfrlyq jelige birigip jatyr
ASTANA. KAZINFORM – Digital Qazaqstan ulttyq strategııasy aıasynda Energetıka mınıstrligi Otyn-energetıka kesheniniń (OEK) búkil ınfraqurylymyn ashyq onlaın júıege biriktiretin biryńǵaı tsıfrlyq kontýr qalyptastyrýdy bastady. Bul týraly mınıstrliktiń baspasóz qyzmeti habarlady.
Tehnologııalyq transformatsııanyń alǵashqy kezeńi qazirdiń ózinde aıaqtaldy. Vedomstvo jylytý maýsymyna daıyndyqty baqylaýdyń tsıfrlyq quraldaryn engizip, elektr stantsııalary úshin tarıfterdi bekitý protsesin tolyq avtomattandyrdy. Munaı men suıytylǵan gazdy bólý elektrondyq formatqa kóshirildi. Bul «adamı faktordy» joıyp, naryq qatysýshylary úshin resýrstarǵa ádil qoljetimdilikti qamtamasyz etti.
Tsıfrlandyrý jáne jasandy ıntellekt jyly aıasynda mınıstrlik salanyń vırtýaldy arhıtektýrasyn qurýdy iske qosýda. Negizgi jańashyldyqtardyń biri – elektr energııasyn óndirý jáne munaı-gaz sektoryndaǵy strategııalyq nysandar úshin «tsıfrlyq egizder» tehnologııasyn engizý. Zııatkerlik algorıtmderdi paıdalaný jabdyqtardyń tozýyn onlaın rejımde taldaýǵa múmkindik berip, apattardyń saldaryn joıý tájirıbesinen olardy aldyn ala boljaý jáne boldyrmaý júıesine kóshýge jol ashady.
Sonymen qatar kómirsýtekterdiń tolyq tsıfrlyq qadaǵalaý júıesi engiziledi. Árbir tonna shıkizat pen otynnyń qozǵalysy munaı uńǵymasynan bastap sońǵy tutynýshynyń janarmaı bagyna deıingi barlyq kezeńderde tsıfrlanady. Bul shara jetkizilimderdiń tolyq ashyqtyǵyn qamtamasyz etip, janar-jaǵarmaı naryǵyndaǵy kez kelgen kóleńkeli aınalymdy tehnıkalyq turǵydan múmkin emes etedi.
Uzaq merzimdi josparlaý úshin OEK-ti damytýdyń ıntegratsııalanǵan master-jospary ázirlenýde. Onyń negizine energııa tutynýdyń ósýin dál boljaýǵa, ekonomıkanyń ártúrli sektorlarynyń jumysyn úılestirýge jáne ınvestıtsııalyq táýekelderdi baǵalaýǵa múmkindik beretin tsıfrlyq matematıkalyq modelder engiziledi.
Bul aýqymdy transformatsııa ónerkásiptik qaýipsizdiktiń joǵary deńgeıin qamtamasyz etip, energetıkalyq júıeniń turaqty jumysyn jáne Qazaqstannyń ınvestıtsııalyq tartymdylyǵyn arttyrýǵa múmkindik beredi.
Aıta keteıik, buǵan deıin tsıfrlandyrý nátıjesinde qurylys salasynyń tıimdiligi 46 paıyzǵa artatynyn jazdyq.