Danıal Rahmatýllaev ITF reıtınginde Qazaqstannyń birinshi raketkasy atandy

AQTAÝ. QazAqparat – Halyqaralyq tennıs federatsııasy (ITF) 18 jáne odan kishi jas sanatynda jańartylǵan álemdik jasóspirimder reıtıngin jarııalady, dep habarlaıdy QazAqparat tilshisi.

«17 jastaǵy Danıal Rahmatýllaev birden 86 pýnktke kóterilip, qazir 178-orynda tur. Bul – qazirgi ýaqytta qazaqstandyqtar arasynda eń úzdik nátıje. Qazaqstandyq sportshylar arasynda Erasyl Erdılda 194-orynda ornalasqan. Amır Omarhanov -204-shi, Vıtalıı Zaptsepın 222-shi, Ilıas Maratýly 269-shy, Danır Kaldybekov 397-shi, Jakas Kozbak 471-shi, Zangar Nýrlanýly 568-shi orynda», - dep málim etti Mańǵystaý oblystyq Sport basqarmasynyń baspasóz qyzmetinen.

Aıta ketsek, osy jyly shilde aıynda Irannyń astanasy Tegeran qalasynda Danıal Rahmatýllaev ekinshi ret qatarynan ITF Juniors serııasyndaǵy tennıs týrnırinde jeńiske jetti.

Danıal Aqtaý – qalalyq tennıs boıynsha balalar jáne jasóspirimder sport mektebiniń sportshysy. Jattyqtyrýshysy – Bereket Jánibekov.