Damýshy elderde ınflıatsııalyq qysym saqtalýda – Ulttyq bank
«Damýshy elderden keıin damyǵan elderdiń jekelegen ortalyq bankteri monetarlyq talaptardy kúsheıtý tsıkline kire bastaıdy. 2021 jyldyń basynan bastap 31 ortalyq bank, onyń ishinde damyǵan elder – Norvegııa jáne Ońtústik Koreıa negizgi mólsherlemeni kóterdi. Reseıdiń ortalyq banki sońǵy otyrysynda negizgi mólsherlemeni 7,5%-ǵa deıin 0,75 p.t. arttyra otyryp, monetarlyq saıasatty kúsheıtý tsıklyn belsendi túrde jalǵastyrdy. Bul sheshim naqty ınflıatsııanyń boljamdy mánderden aıtarlyqtaı aýytqýymen negizdeledi.
2021 jyldyń qorytyndysy boıynsha Reseıde ınflıatsııa 7,4–7,9% aralyǵynda bolady dep kútilýde», - delingen Ulttyq bank málimetinde.
Sonymen qatar, syrtqy ınstıtýttar ınflıatsııanyń tez tómendeýi bolmaıdy dep otyr.
«HVQ boljamdary boıynsha damyǵan elderde jyl sońyna deıin ınflıatsııa boıynsha eń joǵary mánderge qol jetkizý kútiledi, keıinnen 2022 jyldyń ortasyna qaraı pandemııaǵa deıingi mánderge qaıta oralady. Damýshy elderde valıýta baǵamdarynyń álsireýi saldarynan azyq-túlik, munaı jáne ımporttyq taýarlar baǵasynyń ósýine baılanysty ınflıatsııalyq qysym saqtalady. Aldaǵy otyrys qarsańynda AQSh FRJ ekonomıkanyń ashylýyna qaraı baǵalarǵa joǵary qysymdy atap ótti. Retteýshiniń pikirinshe, ınflıatsııa tómendeı bastaǵanǵa deıin kútilgennen uzaq ýaqyt boıy joǵary deńgeıde qalady. Osyǵan baılanysty 2021 jylǵa arnalǵan ınflıatsııa boıynsha boljamdar kóterilý jaǵyna qaraı túzetildi», - dep atalyp ótken UB habarlamasynda.
«Joǵary syrtqy jáne ishki ınflıatsııalyq ahýal jaǵdaıynda Ulttyq bank 2022 jyly 4-6% dálizine kirý maqsatynda aqsha-kredıt saıasatyn qalypqa keltirýdi jalǵastyrýda. Osy maqsatqa qol jetkizý Úkimettiń jáne jergilikti atqarýshy organdardyń Inflıatsııaǵa qarsy den qoıý sharalary keshenin tıimdi iske asyrýyna da baılanysty. Ulttyq bank dezınflıatsııalyq aqsha-kredıt saıasatyn, onyń ishinde qabyldanyp jatqan ınflıatsııaǵa qarsy sharalardyń nátıjeliligin taldaý negizinde júrgizýdi jalǵastyrady», - delingen taratylǵan aqparatta.
Aıta keteıik, QR Ulttyq banki bazalyq mólsherlemeni 9,75%-ǵa deıin kóterý týraly sheshim qabyldady.
