«Damý» qory malshylardyń nesıesine 85% kepildik beredi

ASTANA. KAZINFORM – «Damý» qory mal sharýashylyǵyna nesıe rásimdegen aýyl turǵyndaryna 85% kepildik usynady. Premer-mınıstrdiń orynbasary – Ulttyq ekonomıka mınıstri Serik Jumanǵarın Májilis depýtatynyń saýalyna joldaǵan jaýapta osy sharanyń qarjylyq tetikteri pysyqtalyp jatqanyn aıtady.

- Memleket basshysynyń tapsyrmasyna sáıkes 2026-2030 jyldarǵa arnalǵan mal sharýashylyǵy salasyndaǵy agrobıznesti qoldaý jáne damytý jónindegi keshendi jospardyń jobasy ázirlendi. Joba aıasynda aınalym qarajatyna 5% mólsherleme boıynsha jeńildikpen kredıt berý, asyl tuqymdy mal satyp alýǵa jáne otarlanǵan jaıylymdyq mal sharýashylyǵyn damytýǵa 6% mólsherleme boıynsha kredıt berý, jaıylymdyq ınfraqurylymdy damytý jáne kadrlyq áleýetti nyǵaıtý jónindegi sharalar kózdelgen, - deıdi vıtse-premer.

Sondaı-aq, ol «Іsker aımaq» baǵdarlamasy arqyly bylǵary, sút, qolóner ónimderi sııaqty shıkizat túrlerin óndirý, óńdeý kózdelip otyrǵanyn aıtady.

- Atalǵan kredıttik ónimderdi iske asyrý úshin «Damý» qory arqyly 85%-ǵa deıin kepildendirý tetigin engizý josparlanyp otyr. Qazir keshendi jospar boıynsha qajetti qarjylandyrý eseptelip, keıinnen múddeli memlekettik organdarmen kelisýge joldanady, - deıdi Ulttyq ekonomıka mınıstri.

Buǵan deıin bıznesti memlekettik qoldaý sharalaryna júrgizilgen aýdıt qorytyndysy boıynsha 14 materıal quqyq qorǵaý organdaryna joldanǵanyn jazǵan edik.