Damask mańynda Izraıl soqqysynan jeti adam qaza tapty
ASTANA.KAZINFORM — Sırııa qorǵanys mınıstrligi jeksenbi kúni Sırııa astanasynyń ońtústigindegi Saıeda Zaınab aýdanyndaǵy turǵyn úıge jasalǵan soqqydan 7 beıbit turǵyn qaza tapty dep habarlady. Bul bir aptadan az ýaqyt ishinde jasalǵan ekinshi shabýyl, dep jazady Kazinform agenttiginiń menshikti tilshisi.
Mınıstrlik málimdemesinde qaza tapqandar arasynda áıelder men balalar bar ekeni jáne 20 adamnyń jaralanǵany aıtylǵan.
Ótken aptada Izraıl áýe kúshteri «Hezbollanyń» sol aımaqtaǵy barlaý nysandaryna soqqy bergenin málimdegenimen, bul soqqyǵa qatysty pikir bildirmedi.
«Hezbolla bekinisi jáne shıitterdiń negizgi qulshylyq orny ornalasqan Saıeda Zaınab aımaǵy buryn da Izraıl soqqylarynyń nysanasy bolǵan. Qulshylyq orny janyndaǵy qatty garnızondyq aımaq ta „Hezbolla“ uıymynyń belgili tiregi», — dep habarlaıdy Reuters.
Keıin Sırııadaǵy adam quqyqtaryn baqylaý ortalyǵy (SOHR) qaza tapqandar sany toǵyzǵa jetkenin habarlady. Olardyń arasynda tórt beıbit turǵyn (áıel men onyń úsh balasy), Hezbollanyń bir qolbasshysy jáne tórt belgisiz adam bar. Taǵy 14 adam zardap shekti, olardyń arasynda balalar men áıelder de bar.
SOHR senimdi derekkózderge silteme jasap habarlaýynsha, Izraıl shabýyly lıvandyq otbasylar men Hezbolla músheleri turatyn ǵımarattaǵy páterdegi adamdardy nysanaǵa alǵan.
Izraıl 2023 jyly 7 qazanda HAMAS-tyń Izraılge jasaǵan shabýylynan keıin jáne ásirese Izraıl men Hezbolla arasyndaǵy qaqtyǵystyń shıelenisýinen keıin Sırııaǵa shabýyldaryn kúsheıtti.
Iran Syrtqy ister mınıstrligi Sırııaǵa áýe shabýylynan keıin Izraılge qarý-jaraq embargosyn engizýge jáne bul eldi Birikken Ulttar Uıymynan shyǵarýǵa shaqyrady.
Syrtqy ister mınıstrliginiń ókili Ismaıl Bagaı Tegeran «sıonıstik rejımniń búgin Damask aımaǵyndaǵy turǵyn úıge jasaǵan agressıvti shabýylyn qatań aıyptady» dedi.
Buǵan deıin Bınıamın Netanıahý jeksenbi kúngi aptalyq kabınet otyrysynda qyrkúıektegi «Hezbolla» músheleriniń peıdjerleri men radıolary jarylysynyń artynda Izraıl turǵanyn alǵash ret moıyndaǵanyn habarlaǵan edik.
