Daktıloskopııadan ótý talabyna ózgerister: Senat qujatty maquldady
Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine «Azamattarǵa arnalǵan úkimet» memlekettik korporatsııasy, Astana Hub halyqaralyq tehnologııalyq parki jáne daktıloskopııalyq tirkeý máseleleri boıynsha ózgerister men tolyqtyrýlar engizý týraly» Zańy maquldandy, dep habarlaıdy Kazinform.
Parlament depýtattary bastamashylyq jasaǵan Zańnyń maqsaty – «Azamattarǵa arnalǵan úkimet» memlekettik korporatsııasy qyzmetiniń keıbir ózekti máselelerin retteý, Qazaqstan Respýblıkasynyń memlekettik qyzmetter kórsetý salasyndaǵy zańnamasyn jetildirý, sondaı-aq azamattardy daktıloskopııalyq tirkeýge jáne Astana Hub halyqaralyq tehnologııalyq parkine qatysýshylardyń jumys isteýine baılanysty máselelerdi reglamentteý.
Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń málimetinshe, zańda qyzmetkerlerdiń jaýapkershiligin arttyrý eskerilgen. Bul rette, quqyq buzýshylyqtardyń aldyn alý maqsatynda memlekettik qyzmetterdi tikeleı kórsetetin nemese azamattardyń derbes derekterine qol jetkize alatyn memlekettik korporatsııa qyzmetkerleriniń jekelegen sanattaryn memlekettik fýnktsııalardy oryndaýǵa ýákilettik berilgen adamdarǵa teńestirilgender qataryna jatqyzý qarastyrylǵan. Norma 2025 jylǵy 1 qańtarynan qoldanysqa engiziledi.
Sonymen qatar «Azamattarǵa arnalǵan úkimet» memlekettik korporatsııasynyń mártebesi ózgertilmek. Engiziletin túzetýlerge sáıkes Memlekettik korporatsııa front-ofısterdiń jumysy jáne qosymsha servısterdi iske asyrý bóliginde memlekettik qyzmetter kórsetýge ótinishterdi qabyldaý jáne olardyń nátıjelerin berý jónindegi jumysty uıymdastyrý salasyndaǵy biryńǵaı provaıder bolmaıdy.
Budan bólek, Memlekettik korporatsııaǵa «E-Ótinish» aqparattyq júıesi aıasynda jeke jáne zańdy tulǵalardyń ótinishterin qabyldaýdy uıymdastyrý quzyretin berý eskerilgen.
«Aqparattandyrý týraly» QR Zańynda Astana Hub halyqaralyq tehnologııalyq parkiniń qatysýshysy 2024 jylǵy 1 qańtardan bastap atalǵan parktiń tirkelgen jeri boıynsha ornalasýy tıis degen talap qamtylǵan. Degenmen, qajet ınfraqurylymnyń bolmaýyna baılanysty Zańmen Astana Hub halyqaralyq tehnologııalyq parkine qatysýshynyń ornalasqan jeri boıynsha osy talaptar alynyp tastalady.
Munymen qosa, qarastyrylyp otyrǵan Zańmen engizilgen mańyzdy jańashyldyqtyń biri – daktıloskopııalyq tirkeý týraly erejeler. Máselen, «Daktıloskopııalyq jáne genomdyq tirkeý týraly» 2016 jylǵy Zańnyń 2-taraýynda Qazaqstan azamatynyń pasportyn nemese jeke kýáligin alý úshin alǵash ret júgingen, sondaı-aq buryn daktıloskopııalyq tirkeýden ótpegen Qazaqstan azamattary ony qalpyna keltirgen, aýystyrǵan jaǵdaılarda elimizdiń azamattaryn mindetti daktıloskopııalyq tirkeý týraly normalar belgilengen bolatyn. Alaıda «Daktıloskopııalyq jáne genomdyq tirkeý týraly» QR Zańynyń 39-babymen 2-taraýdyń qoldanysy 2024 jylǵy 1 qańtarǵa deıin toqtatyla turǵan. Búgin maquldanǵan Zańda Qazaqstan azamattaryna qatysty joǵaryda kórsetilgen erejeler alynyp tastalady jáne elimiz azamattary úshin olardyń kelisimimen ǵana erikti daktıloskopııalyq tirkeý engiziledi. Mindetti daktıloskopııalyq tirkeý teńizshiniń jeke kýáligin alǵan jaǵdaıda ǵana saqtalady.
Atap aıtqanda, «Daktıloskopııalyq jáne genomdyq tirkeý týraly» QR Zańynda belgilengen jaǵdaılarda 16 jasqa tolǵan sheteldikter men azamattyǵy joq adamdar úshin mindetti daktıloskopııalyq tirkeý bolady. Zańǵa sáıkes daktıloskopııalyq tirkeýge qatysty erejeler 2024 jylǵy 1 qańtardan bastap qoldanysqa engiziledi.
Sheteldikter men azamattyǵy joq adamdar úshin jeke sáıkestendirý nómirin alýǵa Qazaqstan aýmaǵyndaǵy tirkeýshi organdarǵa jeke óziniń júginý talaby engiziledi. Buryn olar muny basqa adamdarǵa berilgen senimhat negizinde naqty ornalasqan jeri boıynsha jasaı alatyn.
Tutastaı alǵanda, Zańda Qazaqstan Respýblıkasynyń 17 zańnamalyq aktisine, onyń ishinde 5 kodekske jáne 12 zańǵa ózgerister men tolyqtyrýlar engizý qarastyrylǵan. Zań maquldanǵan kezde bolatyn nátıje: memlekettik qyzmetti alýshylardyń múddesine saı zańnamany jetildirý, Memlekettik korporatsııa qyzmetkerleriniń jaýapkershiligin arttyrý, memlekettik kórsetiletin qyzmetke qosymsha servısterdi engizý arqyly Memlekettik korporatsııanyń qosymsha tabys alýy úshin múmkindik berý, daktıloskopııalyq tirkeýdi júrgizýdiń quqyqtyq negizderin jaqsartý.
