D jáne E sanatyndaǵy adamdar MÁMS sheńberinde medıtsınalyq kómek ala alady

ASTANA.KAZINFORM – Qazaqstanda mindetti áleýmettik medıtsınalyq saqtandyrý (MÁMS) júıesindegi birqatar negizgi jańalyqtardy kózdeıtin zań qabyldandy.

QR Densaýlyq saqtaý mınıstrligi málimetinshe, qabyldanǵan zań sheńberinde 2026 jyly MÁMS júıesi jergilikti bıýdjet qarajaty esebinen daǵdarysty jáne shuǵyl ál-aýqat deńgeıi (D jáne E sanattary) bar 1 mıllıonǵa jýyq adamdy qosymsha qamtıtyn bolady. Bul tabysy tómen QR azamattarynyń taǵy 5%-y MÁMS esebinen josparly medıtsınalyq kómekke qol jetkize alatynyn bildiredi.

Halyqtyń osy sanattary úshin jarnalar osy azamattardyń medıtsınalyq kómekke júginý faktisi boıynsha jergilikti atqarýshy organdarǵa júkteletin bolady. Budan basqa, JAO-nyń jumyssyzdyq deńgeıin tómendetý jáne halyqty jumyspen qamtýǵa járdemdesý úshin tikeleı jaýapkershiligin eskere otyryp, resmı tirkelgen jumyssyzdar úshin MÁMS jarnalaryn tóleýge arnalǵan shyǵystar da jergilikti bıýdjetterge júkteletin bolady. Búginde 16,9 mln adam (82,6%) saqtandyrylǵan, onyń ishinde 11,9 mln adam (59,5%) halyqtyń jeńildetilgen sanattaryna jatady. Olar úshin MÁMS jarnalaryn memleket tóleıdi.

Bul memlekettiń áleýmettik jaýapkershiliginiń joǵary deńgeıin kórsetedi. MÁMS júıesinen tys 3,4 mln-ǵa jýyq adam qalady. Onyń ishinde 2,4 mln-y jaǵdaıy jaqsy jáne qanaǵattanarlyq ómir súrý deńgeıi bar azamattar, al 1 mln-ǵa jýyǵy - áleýmettik ál-aýqattyń daǵdarystyq (D) jáne shuǵyl (E) deńgeılerine jatatyn azamattar.

2,4 mln adam eńbekke qabiletti jastaǵy azamattar tobyndaǵy adamdar úshin saqtandyrý júıesine kirý jeńil ári aýyrtpalyqsyz bolyp qalady:

Aıyna 4250 teńge nemese jylyna 51 000 teńge.

2027 jyldan bastap Qazaqstan barlyq taraptyń — memlekettiń, jumys berýshilerdiń jáne azamattardyń ortaq jaýapkershiliginiń barynsha joǵary dárejesimen tolyqqandy saqtandyrý modeline kóshýdi josparlap otyr.

Bul is-sharalar «Halyq densaýlyǵy jáne densaýlyq saqtaý júıesi týraly» kodekste bekitilgen ortaq jaýapkershilik qaǵıdattaryn iske asyrýǵa jáne azamattyń áleýmettik jaǵdaıyna qaramastan medıtsınalyq kómekke ádil qol jetkizýdi qamtamasyz etýge múmkindik beredi.

Endi eń áleýmettik osal azamattar medıtsınalyq kómekti kedergisiz ala alady.

Aıta keteıik, MÁMS aıasynda 1,1 trln teńgege medıtsınalyq kómek kórsetildi.