Cý tasqyny juqpaly aýrýǵa sebep bolýy múmkin

PETROPAVL. KAZINFORM – Sý tasqyny kezinde qolaısyz epıdemıologııalyq jaǵdaı týyndaýy múmkin. Juqpaly aýrýdyń aldyn alý úshin jeke bas gıgıenasynan bólek qarapaıym qaýipsizdik erejelerin saqtaǵan jón. 

Soltústik Qazaqstan oblysynyń sanıtarııalyq-epıdemıologııalyq baqylaý departamentiniń tehnıkalyq reglamentterdiń talaptaryn baqylaý bóliminiń basshysy Marına Davletbaevanyń aıtýynsha, jaıylǵan sýdan keler qaýip kóp. Materıaldyq shyǵynnan bólek, tasqyn sý túrli aýrýdyń taralýyna sebep bolýy múmkin. Sonyń ishinde gepatıt, tyrysqaq, ish súzegi, dızenterııa, leptospıroz, týlıaremııa, qurttar, brýtsellez, salmonellez sekildi juqpaly aýrýlar bar.

«Sý arqyly beriletin vırýstyq aýrýlardyń ishinde enterovırýstar, A gepatıti jıi kezdesedi. Tasyǵan ózen, kól sýy jaıylyp, qaldyq úshin qazylǵan shuńqyrlardy, dárethanalardy, aýlany shaıyp, qudyqqa quıylýy múmkin. Sondyqtan sý tasyǵan ýaqytta qaınatylmaǵan sý ishken densaýlyqqa zııan. Jaramdylyq merzimi jetkilikti bótelkedegi sýdyń qoryn jasańyz. Ony sýmen shaıyp ketpeıtin bıik jerde saqtańyz. Іshý jáne tamaq pisirý úshin tek osy bótelkedegi nemese qaınatylǵan sýdy paıdalanyńyz», - deıdi Marına Davletbaeva. 

Tasqyn sýǵa malynǵan tamaq ónimderin, máselen jertólede jatqan kókónisterdi paıdalaný da qaýipti. Kókónister men jemisterdi shıki túrde jegen kezde olardy bótelkedegi nemese qaınatylǵan sýmen jaqsylap shaıyp jýǵan jón. 

«Jeke gıgıena erejelerin qatań saqtańyz, ıaǵnı dárethanaǵa barǵannan keıin, janýarlardy ustaǵannan keıin, tamaq daıyndamas buryn jáne tamaqtanar aldynda qolyńyzdy sabynmen muqııat jýyńyz.  Aýrýdyń alǵashqy belgilerin baıqaǵan jaǵdaıda ózińizdi-ózińiz emdemeı, dereý densaýlyq saqtaý mekemesine medıtsınalyq kómekke júginińiz», - deıdi sanıtar dáriger. 

Sý tasqyny ótkennen keıin de qaýipsizdikti umytpaǵan jón. 

«Aýlany tasqyn sý ákelgen qoqystardan tazartyp, keıin ony qatty turmystyq qaldyqtar polıgonyna aparyńyz. Qoldanysta qudyq bar bolsa, ondaǵy lastanǵan sýdy sorǵyzyp, ishin dezınfektsııalaý kerek, bul ásirese saıajaı jáne aýyl turǵyndaryna úshin asa mańyzdy. Esik aldynda jumys istegende ınfektsııa qolmen aǵzaǵa enbeýi úshin qolǵa qolǵap kıgen jón, sondaı-aq, jumys kezinde tamaq ishpeńiz jáne temeki shekpeńiz. Úı ýchaskesin jınaý barysynda ınfektsııa shańmen aǵzaǵa túspeýi úshin jumystardy oryndaý kezinde aýzyńyz ben murnyńyzdy medıtsınalyq maskamen nemese dáke tańǵyshpen jabyńyz. Sý basqan jerlerde ornalasqan bulaqtardan sý ishý qaýipti jáne turmystyq qajettilikter úshin tabıǵı sý qoımalarynyń sýyn paıdalanbańyz. Іshýge bótelkedegi sýdy paıdalanýdy usynamyz», - deıdi maman. 

Buǵan deıin SQO-da 87 eldi mekendi sý basý qaýpi bar ekenin aıtqan edik. 

Óńirdiń birqatar aýdandarynda ornalasqan shaǵyn ózenderdiń sý deńgeıi kóterilip keledi. Al Shaǵalaly ózeninde bir táýlikte sý deńgeıi birden 1,5 metrge artty. 

28 naýryz kúni SQO-ǵa Premer-Mınıstr Oljas Bektenov kelip, oblystyń sý tasqynyna daıyndyǵyn kórdi.