CTS avtobýs jolaýshylaryna mańyzdy málimdeme jasady

ASTANA. KAZINFORM – CTS kólik kompanııasy avtobýstaǵy joǵalǵan zattarǵa qatysty málimdeme jasady, dep habarlaıdy Astana ákimdiginiń resmı saıty. 

CTS kólik kompanııasy qala turǵyndary men qonaqtaryna habarlandyrýynda avtobýstan tabylǵan barlyq zatty júrgizýshige tapsyrý kerek ekenin basa aıtqan. Ár avtobýstyń salonynda 4-ten 8-ge deıin beınebaqylaý kamerasy ornatylǵanyn, jolaýshylardyń kirý/shyǵýynan bólek, kameralar dybysty da jazatynyn habarlaǵan.

Qaladaǵy qoǵamdyq kólikterdiń birinde jýyrda áıel adam uıaly telefonyn umytyp ketken. Ol bir aıaldamadan keıin qaıtyp oralǵanda smartfon ornynda bolmaǵan. Osyndaı jaǵdaılar qaıtalanbas úshin CTS kólik kompanııasy jolaýshylarǵa muqııat bolýdy, ózgeniń múlkine qol suqpaýdy, joǵalǵan dúnıeni kórgen jaǵdaıda avtobýs júrgizýshisine tapsyrýdy eskertken. 

«Qurmetti jolaýshylar, avtobýs salonynda sómke, telefon jáne basqa da zattar tabylǵan kezde olardy júrgizýshige tapsyrýlaryńyzdy suraımyz. Óz zatyn umyt qaldyrǵan adam oǵan mindetti túrde oralatyny anyq. Óıtkeni oǵan óziniń zaty asa qajet ekeni belgili. Al, júrgizýshi óz kezeginde aýysym aıaqtalǵannan keıin tabylǵan zatty avtobýs parkiniń dıspetcherine tapsyrady», - delingen kompanııa habarlamasynda.